پشاور ،21 نومبر ( سیاست ڈاٹ کام) وفاقی دارالحکومت اسلام آباد اور پشاور سمیت خیبرپختونخوا کے مختلف علاقوں میں آج زلزلے کے جھٹکے محسوس ہوئے، جس سے عوام میں خوف و ہراس پھیل گیا ہے۔ جمعہ کی دوپہر اسلام آباد، پشاور، مانسہرہ اور گردونواح میں زلزلے کے جھٹکوں پر لوگ پریشان ہوگئے۔ اسلام آباد میں جھٹکے محسوس ہونے کے بعد لوگوں کی بڑی تعداد اپنے گھروں اور دفاتر سے باہر نکل آئی۔ پشاور اور مانسہرہ سمیت خیبر پختونخوا و دیگر علاقوں میں جھٹکوں کے بعد خوفزدہ عوام کلمہ طیبہ کا ورد کرتے ہوئے گھروں سے باہر نکل آئے۔ زلزلے کا مرکز افغانستان اور تاجکستان کا سرحدی علاقہ تھا۔ زلزلے کی شدت 5.2 ریکارڈ کی گئی جبکہ اس کی گہرائی 160کلومیٹر تھی۔ تاہم کوئی جانی یا مالی نقصان کی اطلاع نہیں ہے۔
