نیو یارک، 14 نومبر (سیاست ڈاٹ کام) ایبٹ آباد کے کمپائونڈ میں اسامہ کے آخری لمحات سے متعلق مزید تفصیلات سامنے آئی ہیں۔ امریکی نیوی سیل ٹیم کے رکن رابرٹ او نیل کا کہنا ہے کہ جوں ہی اس کا القاعدہ کے سربراہ سے سامنا ہوا، اس نے گولیاں چلانے میں دیر نہ کی، جس کے بعد اسامہ بمشکل چند لمحے ہی زندہ رہا۔ اپنی شناخت ظاہر کرنے والا او نیل اس خفیہ ترین نیوی سیل ٹیم کا حصہ تھا جو ایبٹ آباد میں اسامہ کے کمپائونڈ میں داخل ہوئیں۔ او نیل کا دعویٰ ہے کہ بن لادن سے اسی کا سامنا ہوا اور اس نے چہرے پر تین گولیاں ماریں۔ واقعہ کی منظر کشی کرتے ہوئے او نیل بتاتا ہے کہ جوں ہی وہ دائیں جانب مڑا اس کے سامنے ایک شخص اپنی بیوی پر ہاتھ رکھے کھڑا تھا۔
