ارریہ۔20 جون (سیاست ڈاٹ کام) بہار میں ضلع ارریہ کے تاراباڑی تھانہ علاقہ کے سکسینہ گاؤں کے قریب آج ایک گاڑی کے پلٹ جانے سے چھ باراتیوں کی موت ہو گئی اور ایک زخمی ہو گیا۔ پولیس ذرائع نے یہاں بتایا کہ ضلع کے چکنی گاؤں میں بارات سے کچھ لوگ گاڑی سے بوسی تھانہ علاقہ کے ڈوریاری گاؤں واپس آ رہے تھے تبھی سکسینہ گاؤں کے قریب ان کی گاڑی بے قابو ہوکر ایک درخت سے ٹکرا کرتالاب میں پلٹ گئی۔ اس حادثے میں گاڑی میں سوار چھ باراتیوں کی موقع پر ہی موت ہو گئی اور ایک زخمی ہو گیا۔ ذرائع نے بتایا کہ مرنے والوں کی فوری شناخت نہیں کی جا سکی ہے۔ حادثے کی وجہ ڈرائیور کا اسٹیئرنگ پر کنٹرول کھو دینا بتائی جا رہی ہے۔ لاشوں کو پوسٹ مارٹم کے لئے بھیج دیا گیا ہے۔
