کراچی، 17 نومبر (سیاست ڈاٹ کام) سابق صدر آصف علی زرداری نے چیئرمین ہاشو گروپ صدرالدین ہاشوانی کو ایک ارب روپے ہرجانے کا نوٹس بھجوا دیا ہے۔ میڈیا رپورٹ کے مطابق زرداری کی طرف سے قانونی نوٹس سنیٹر فاروق ایچ نائیک نے بھجوایا جس میں کہا گیا ہے کہ ہاشو گروپ کے چیئرمین صدر الدین ہاشوانی نے اپنی کتاب میں آصف زرداری کی پاکستانی معاشرے کیلئے خدمات کی نفی اور ان کی ساکھ متاثر کرنے کی کوشش کی ہے۔ نوٹس میں مصنف اور پبلشر کو دکانوں سے یہ کتاب اٹھانے کیلئے 14 دن دیئے گئے ہیں۔ مقررہ وقت میں ایک ارب روپے ادا نہ کرنے کی صورت میں عدالت سے رابطہ کیا جائے گا۔ سابق صدر نے نوٹس کی تمام رقم کسی خیراتی ادارے کو دینے کا فیصلہ کیا ہے۔
