بنگلو ر۔ 26 ۔ مارچ (سیاست ڈاٹ کام) آدھار اسکیم پر بی جے پی کے اننت کمار کی جانب سے ہدف تنقید بنائے جانے پر برہم بنگلور (جنوبی ) کے کانگریسی امیدوار نندن نیلکنی نے آج الیکشن کمیشن میں اننت کمار کے خلاف شکایت درج کروائی ہے اور کہا ہے کہ اننت کمار بدعنوانیوں کے حامی اور ترقی کے خلاف ہیں۔ نیلکنی جو انفوسیس کے معاون بانی ہیں اور آدھار پروگرام کے روح رواں سمجھے جاتے ہیں، نے کہا کہ اننت کمار حکومت کی اسکیم کو نشانہ بناتے ہوئے سیاسی فائدہ حاصل کرنا چاہتے ہیں جبکہ آدھار اسکیم نے سارے ملک کی توجہ اپنی جانب مبذول کروالی ہے حالانکہ یہ ایسی اسکیم ہے جسے کچھ ماہ قبل خود اننت کمار بھی فروغ دینے میں مشغول تھے۔
