غزہ ۔ 26 جون (سیاست ڈاٹ کام) فلسطین کے علاقے غزہ پٹی کی مشرقی سرحد پر آتش گیر کاغذی جہاز اور گیسی غبارے اڑانے والوں پر اسرائیلی فوج نے ڈرون حملہ کیا ہے جس کے نتیجہ میں کم سے کم تین فلسطینی شہری زخمی ہوگئے۔ فلسطینی میڈیا رپورٹس کے مطابق غزہ میں وزارت صحت کی طرف سے جاری کردہ ایک بیان میں کہا گیا ہیکہ اسرائیلی فوج نے بغیر پائلٹ ایک ڈرون طیارے کی مدد سے مشرقی غزہ میں فلسطینیوں کے ایک گروپ پر بمباری کی، جس کے نتیجے میں تین فلسطینی زخمی ہوگئے۔ زخمیوں کو علاج کیلئے ہاسپٹل منتقل کیا گیا ہے جہاں ان کی حالت تشویشناک بیان کی جاتی ہے۔ قبل ازیں اسرائیلی فوج نے غزہ میں ایک موٹر سائیکل کو بھی نشانہ بنایا جس کے نتیجہ میں ایک فلسطینی شہری معمولی زخمی ہوگیا۔ ادھر اسرائیلی فوج نے دعویٰ کیا ہیکہ غزہ پٹی میں بمباری کا نشانہ بننے والوں میں غزہ کی مشرقی سرحد پر آتش گیر کاغذی جہاز پھینکنے والے فلسطینی شامل ہیں۔ خیال ریہکہ غزہ کی مشرقی سرحد پر 30 مارچ سے فلسطینی ایک نئے مزاحمتی اسلوب پر عمل پیرا ہیں۔ فلسطینی نوجوان آتش گیر کاغذی جہاز اور گیسی غبارے اسرائیل کی طرف پھینک دیتے ہیں جن کے گرنے سے علاقہ میں آگ بھڑک اٹھتی ہے۔ اس آتشزدگی کے باعث اب تک اسرائیل کو کروڑوں شیکل کا نقصان پہنچ چکا ہے۔
