نئی دہلی5نومبر (سیاست ڈاٹ کام) گنگا کی صفائی اور ہموار بہاؤ کو لے کر اتراکھنڈ رشی کیش اور کنکھل ہری دوار میں غیر معینہ بھوک ہڑتال پیر کوبھی جاری ہے ۔ اس مسئلہ کو لے کر گنگوتری سے گنگا ساگر کی یاترا اور دیگر پروگراموں کا انعقاد کم از کم سات ریاستوں میں کیا گیا ہے ۔سنت گوپال داس کے اپواس کو پیر کو 135 دن ہو گئے جبکہ برہمچاری آتمبودھانند سرسوتی کی ماترسدن آشرم میں بھوک ہڑتال 24 اکتوبر سے جاری ہے ۔آشرم کے ترجمان برہمچاری دیانند نے پیر کو بتایا کہ سنت گوپال داس کو ہفتہ کو ہری دوار کے جالي گرانٹ اسپتال میں داخل کرایا گیا جہاں سے انہیں ایمس رشی کیش میں شفٹ کر دیا گیا۔ترجمان نے ‘یو این آئی’سے مسٹرداس کی شکایت کا حوالہ دیتے ہوئے کہا” رشی کیش ایمس میں پیر کی صبح کچھ ڈاکٹروں نے مسٹر داس کو کچھ ادویات کھلاني چاہی تو انہوں نے انکار کر دیا اور انکار کرنے پر ان کے ساتھ جھگڑا کیا گیا”۔اس درمیان’واٹرمین آف انڈیا’ کے نام سے مشہور ڈاکٹر راجندر سنگھ نے بتایا کہ’ گنگا سدھ بھاؤنا یاترا’ اتوار کی رات کو کانپور پہنچ گئی۔اس صنعتی شہر میں پورے دن بیداری پروگرام اور میٹنگوں کے بعد الہ آباد کے راستے آج رات اس کے فتح پور پہنچنے کا پروگرام ہے ۔مسٹر سنگھ نے یواین آئی کو فون پر بتایا کہ آنجہانی پروفیسر جی ڈی اگروال کی جانب سے شروع کی گئی ہڑتال کا وسیع پیمانہ پراس کا اثر سامنے آ رہا ہے ،کافی تعداد میں لوگ اس پروگرام میں شامل ہو رہے ہیں۔
