ٹورنٹو ۔یکم نومبر۔ ( سیاست ڈاٹ کام) آسٹریلیا کے بعد کینیڈا نے بھی ایبولا کی وبا سے متاثرہ مغربی افریقی ممالک کے شہریوں کے ملک میں داخلے پر پابندی عائد کر دی ہے۔ جمعہ کے روز کینیڈا کی قدامت پسند حکومت کی جانب سے بتایا گیا ہیکہ ایبولا وائرس سے زیادہ متاثرہ ممالک لائبیریا، گِنی اور سیرالیون کے شہریوں کی ویزے کی درخواستیں معطل کر دی گئی ہیں۔ تاہم حکومتی بیان میں کہا گیا ہے کہ ایسے کینیڈین شہری اور طبی کارکنان جو ان ممالک میں خدمات انجام دے رہے ہیں، وہ کینیڈا واپس آ سکتے ہیں۔ اس سے قبل آسٹریلیا نے بھی اس بیماری سے متاثرہ ممالک کے شہریوں کی ملک میں داخلے پر پابندی عائد کر دی تھی۔
