حیدرآباد ۔ 6 ۔ اپریل : ( پریس نوٹ): مرکزی رویت ہلال کمیٹی صدر مجلس علماء دکن کا ماہانہ اجلاس بضمن رویت ہلال ماہ شعبان المعظم 1440 زیر نگرانی مولانا سید محمد قبول بادشاہ قادری الشطاری معتمد صدر مجلس علماء دکن آج شام حسینی بلڈنگ معظم جاہی مارکٹ میں منعقد ہوا ۔ شہر میں مطلع جزوی ابر آلود تھا چاند نظر نہیں آیا ۔ رویت ہلال کمیٹی گلبرگہ شریف ، کرنول ، کھمم ، کڑپہ ، ادھونی ، بسواکلیان ، اودگیر ، ناندیڑ اور خانقاہ مجیبیہ ( پٹنہ ) سے مطلع ابر آلود ہونے اور چاند نظر نہیں آنے کی اطلاعات ملیں ۔ بنگلور میں بھی چاند نظر نہیں آیا ۔ البتہ بھوپال ، ممبئی ، احمد آباد (گجرات ) سے عام رویت کی اطلاعات ملیں ۔ لہذا تحت احکام شرعیہ مرکزی رویت ہلال کمیٹی صدر مجلس علماء دکن اعلان کرتی ہے کہ بتاریخ 7 اپریل 2019 ء بروز یکشنبہ یکم شعبان المعظم 1440 ھ ہوگی ۔ اس اجلاس میں مولانا سید محمد قبول بادشاہ قادری الشطاری ، مولانا مفتی محمد عظیم الدین ، مولانا مفتی خلیل احمد ، مولانا سید کاظم پاشاہ قادری الموسوی ، مولانا سید محمود بادشاہ قادری زرین کلاہ ، مولانا سید حسن ابراہیم حسینی سجاد پاشاہ قادری اور جناب قاضی سید نور اللہ فاروق عارفی نے شرکت کی ۔۔
شیعہ علماء کا بیان
٭٭ سید علی اصغر جعفری کی اطلاع کے مطابق کل ہند شیعہ مجلس علماء و ذاکرین نے اعلان کیا ہے کہ ہندوستان کے کئی مقامات سے رویت کی تصدیق ہوئی ہے ۔ لہذا 7 اپریل یکشنبہ یکم شعبان 1440 ھ ہوگی۔ اس کی تصدیق حسب ذیل علماء نے کی ۔ مولانا سید نبی حسن زیدی ، مولانا ڈاکٹر سید نثار حسین حیدر آقا ، مولانا رضا عباس خاں ، مولانا سید جلال حیدر ، مولانا عسکری علی خاں اور مولانا جواد عابدی ۔۔