کریم نگر ۔ 2 مارچ (این ایس ایس) کریم نگر کے کانگریس رکن پارلیمنٹ پونم پربھاکر نے آج الزام عائد کیا کہ گجرات کے چیف منسٹر اور بی جے پی کے وزارتِ عظمی کے امیدوار نریندر مودی ان کی تقاریر کے ذریعہ تلگو عوام کے جذبات کی توہین کررہے ہیں۔ یہاں میڈیا کے نمائندوں سے مخاطب کرتے ہوئے مسٹر پربھاکر نے کہا کہ آندھرا پردیش کی تقسیم پر نریندر مودی کے مخالف ریمارکس سے بی جے پی کا اصلی رنگ ظاہر ہوگیا ہے۔ انہوں نے مطالبہ کیا کہ تلنگانہ کے بی جے پی قائدین نریندر مودی کے بیان پر ردعمل ظاہر کریں۔ انہوں نے یہ بھی الزام عائد کیا کہ نریندر مودی تلگو دیشم پارٹی سربراہ این چندرا بابو نائیڈو کے دباؤ میں آکر تلنگانہ کے خلاف بات کررہے ہیں۔
