نئی دہلی، 26 اپریل (سیاست ڈاٹ کام ) موبائل کے روزانہ بڑھتے استعمال سے اب شاید ہی کوئی ایسا شعبہ ہوگا جس کیلئے’موبائل ایپ ‘نہ بنایا گیا ہو۔ملک و بیرون ملک میں ہزاروں ماہرین روزانہ کسی نہ کسی سرویس یا پروڈکٹ کیلئے موبائل ایپ پر کام کر رہے ہیں۔ دنیا بھر میں اربوں لوگوں کی طرف سے موبائل کا استعمال کیا جا رہا ہے جس کی وجہ سے مختلف کمپنیوں کی طرف سے ایپ کے ذریعے گاہک اورسرویس یوزرس تک پہنچنا آسان ہو گیا ہے ۔ ان کے ذریعے ایپ یوزرس اپنی ضرورتوں کے مطابق کمپنیوں کو آرڈر دیتے ہیں اور اسی کے ذریعے خدمات اور مصنوعات کی خریداری اورپیسوں کی ادائیگی بھی ہو جاتی ہے۔ ای کامرس سے وابستہ کمپنیوں نے تو اب اپنی ویب سائٹ کی بجائے صرف ایپ کے ذریعہ ہی یوزرس کو خدمات فراہم کرنی شروع کر دی ہے ۔ کیا ہے موبائل ایپ ؟ بنیادی طور پر ایپ ایک قسم کا چھوٹا کمپیوٹر پروگرام ہوتا ہے جس کا موبائل فون، ٹیبلیٹ یا گھڑیوں وغیرہ میں استعمال کیا جاتا ہے۔ یہ ایپس موبائل فون کے ساتھ ہی آتے ہیں جبکہ دیگر کو ’گوگل پلے اسٹور‘ وغیرہ سے ڈاؤن لوڈ کرتے ہیں ۔
