بھوپال، 7اگست (سیاست ڈاٹ کام) مدھیہ پردیش میں دو نئے میڈیکل کالج کا قیام عمل میں آئے گا۔سرکاری اطلاع کے مطابق ریاست کے وزیراعلی شیو راج سنگھ چوہان کی صدارت میں کل ہوئی کابینی کونسل کی میٹنگ میں سیونی اور چھترپور میں نئے سرکاری میڈیکل کالج کے قیام کو منظوری دی گئی۔ کابینی کونسل نے تعلیمی سال 19۔2018 سے اسکولی تعلیم کے شعبے کے ایک ہی احاطے میں چلنے والے 45 ہزار 384 اسکولوں کو یکجا کرکے 20 ہزار 656 اسکول کے طور پر چلانے کی منظوری بھی دی ۔ اس فیصلے سے ریاست میں اسکولی تعلیم کے شعبے کے تحت ایک ہی کمپلکس میں چلنے والے مختلف اسکولوں کو یکجا کرتے ہوئے ایک اسکول کے طور پر چلایا جائے گا۔کابینی کونسل نے صنعتی ترقی کی پالیسی 2014 اورمدھیہ پردیش اسٹیٹ لینڈس اینڈ بلڈنگ منیجمنٹ ضابطہ 2015 میں ترمیم سے متعلق تجویز کو منظوری دی ہے ۔ ترمیم کے مطابق بند یونٹوں کے منیجمنٹ میں تبدیلی کے بعد انہیں دوبارہ چلانے کے لئے خصوصی پیکج دینے کا فیصلہ کیا گیا ہے ۔صنعتی ترقی کی پالیسی 2014 کے تحت غیر ضروری صنعت کی فہرست کا تجزیہ کرکے ضروری ترامیم کی گئی ہیں۔ مدھیہ پردیش اسٹیٹ لینڈس اینڈ بلڈنگ منیجمنٹ ضابطہ 2015 کے تحت پٹے کی معیاد میں اضافے کے قوانین میں ترمیم کی گئی ہے ۔انڈسٹری پروموشن پالیسی کے تحت نجی شعبے میں دویانگوں (معذوروں) کو روزگار دینے پر مالی مدد کا التزام اور سیاحتی پروجیکٹوں کو صنعت جیسے فوائد دینے پر مالی امداد کا متبادل شامل کرنے کا فیصلہ کیا گیا ہے ۔
