نئی دہلی4اکتوبر(سیاست ڈاٹ کام )سپریم کورٹ نے 22سال پرانے ایک معاملے میں انڈین پولیس سروس(آئی پی ایس)کے سابق افسر سنجیو بھٹ کی اہلیہ شویتا بھٹ کی عرضی جمعرات کو خارج کردی۔چیف جسٹس رنجن گوگوئی،جسٹس سنجے کشن کول اور جسٹس کورین جوزف کی بینچ نے گجرات کیڈر کے سابق آئی پی ایس افسر کی اہلیہ کی عرضی یہ کہتے ہوئے خارج کردی کہ سنجیوبھٹ اگر چاہیں تو کسی بھی قسم کی راحت کے لئے ہائی کورٹ کا رخ کرسکتے ہیں۔عرضی گزار نے اپنی عرضی میں اپنے شوہر کے خلاف چل رہی جانچ کو چیلنج کیا تھا۔انہوں نے الزام لگایا تھا کہ ان کے شوہر کو سپریم کورٹ میں عرضی دائر نہیں کرنے دی جارہی ہے ۔واضح رہے کہ بھٹ کو گجرات سی آئی ڈی نے پانچ ستمبر کو گرفتار کیاتھا۔
یہ گرفتاری 1996کے ایک معاملے میں ہوئی ہے جس میں راجستھان کے ایک وکیل کو مبینہ طورپر منشیات کے معاملے میں پھسایا گیا تھا ۔اس وقت سنجیو بھٹ گجرات کے بناس کانٹھا کے ایس پی تھے ۔
