ماسکو ، 5 نومبر (سیاست ڈاٹ کام) روس میں موبائل فون تیار کرنے والی ایک کمپنی نے صرف مسلمانوں کیلئے مخصوص ایک فون تیار کیا ہے جس میں قرآن مجید، قبلہ نما اور نماز کی اذان کو پہلے ہی انسٹال کر دیا گیا ہے۔ روسی میڈیا کی اطلاع کے مطابق اس موبائل کو ابتدائی طور پر صرف روسی مسلمانوں کیلئے ڈیزائن کیا گیا ہے اور اس میں مکمل قرآن مجید عربی متن اور روسی ترجمے کے ساتھ موجود ہے۔ یہ فون بھی کیو موبائل کمپنی نے تیار کیا ہے اور اس میں ایسا آلہ بھی لگایا گیا ہے جو صارف کی جگہ کے بارے میں بتائے گا اور وہ جس علاقے میں بھی موجود ہو گا وہاں سے اس کی کعبۃ اللہ (مکہ مکرمہ) کی جانب رخ کیلئے رہنمائی کرے گا۔ روسی مسلمانوں کی مرکزی روحانی انتظامیہ کے نمائندے تیمور امائیف نے سرکاری خبر رساں ایجنسی تاس کو بتایا ہے کہ ’’اس موبائل کی تیاری سے قبل ماہرین نے مسلم عقیدے کے پیروکاروں کی دلچسپیوں کا مطالعہ کیا تھا اور ان سے یہ پوچھا تھا کہ ان کی روزمرہ زندگی میں کس طرح کا آلہ مفید رہے گا‘‘۔ انھوں نے بتایا کہ اس موبائل فون کا مینو بہت سادہ اور واضح ہے۔ صارف چند ایک کلک کے بعد قرآن مجید کی سورتوں پر پہنچ جاتا ہے اور وہ اپنی مطلوبہ سورہ کو کھول کر اس کی تلاوت کر سکتا ہے۔
