حیدرآباد 17 مارچ (یو این آئی) تلنگانہ اور آندھراپردیش کے مشترکہ گورنر ای ایس ایل نرسمہن نے شہر حیدرآباد کے پیپلز پلازہ نیکلس روڈ پر پولیس کی شی ٹیمس کی سالانہ دوڑ کو جھنڈی دکھائی ۔اس موقع پر کمشنر پولیس حیدرآباد انجنی کمار نے کہا کہ شہر کو جرائم سے پاک اور خواتین کے لئے محفوظ بنانے کے لئے ان کی مساعی جاری رہے گی۔انہو ں نے ‘‘ امریکہ کی ایک ٹیم نے سروے کے بعد رپورٹ دی ہے جس میں کہا گیا ہے کہ حیدرآباد رہنے کے لئے محفوظ شہر ہے ’’۔ حیدرآباد سٹی پولیس کی شی ٹیمس حیدرآباد میں خواتین کی سلامتی کو یقینی بنانے کی پابند ہے ۔ سماج میں بیداری پیدا کرنے کے لئے شی ٹیمس کی جانب سے پیپلز پلازہ نکلس روڈ پر بین الاقوامی یوم خواتین کی تقاریب کے تسلسل میں رن کا اہتمام کیا جارہا ہے ۔ یہ رن ہر سال منعقد کی جاتی ہے ۔ اس مرتبہ یہ رن اتوار کو منعقد کی گئی جس کے لئے حال ہی میں لوگو’ موضوع’شرٹس’ پوسٹرس اور میڈلس کی اجرائی عمل میں لائی گئی تھی۔ دوڑ کے لئے پہلے ہی 5ہزار افراد نے رجسٹریشن کروایا تھاجس میں سیکلنگ ماسٹرس’رنرس’وہیل چیر کے شرکاء بھی شامل ہیں۔ رجسٹریشن کروانے والوں میں کٹس تقسیم کئے گئے جس میں ٹی شرٹس بھی شامل ہیں۔ بہترین رنرس خاتون اور مرد زمروں میں انعامات دیئے گئے ۔ پہلا انعام 10ہزار روپئے ’ دوسرا انعام5ہزار روپئے اور تیسرا انعام3ہزار روپئے دیا گیا۔ حیدرآباد سٹی ٹریفک پولیس کی جانب سے اس موقع پر ٹریفک کے سلسلہ میں وسیع انتظامات کئے گئے ۔ 17مارچ کو صبح ساڑھے چھ بجے گورنر نے اس رن کو جھنڈی دکھائی۔ 10کیلو میٹر کی دوڑ صبح ساڑھے چھ بجے ۔پانچ کیلو میٹر کی دوڑ صبح 6بجکر 40منٹ اور دو کیلومیٹر کی دوڑ کا آغاز صبح 6بجکر 45منٹ پر ہوا۔ محکمہ پولیس کے پانچ بینڈس نے دوڑ کے راستوں پر مظاہرہ کیا۔ اس دوڑ کا مقصد خواتین کی سلامتی کا پیام پہنچانا ہے ۔ گورنر نے بھی دوڑ میں حصہ لیا۔
