مکۃ المکرمہ۔5 مئی ۔(سیاست ڈاٹ کام) مسجد الحرام کی سکیورٹی فورس کے کمانڈر بریگیڈیئر یحییٰ العقیل نے کہا کہ مسجدالحرام میں رمضان المبارک کے موقع پر ذہنی مریضوں پر نظر رکھنے اور انہیں مطلوبہ نگہداشت فراہم کرنے کیلئے اسپیشل فورس تعینات کر دی گئی ہے۔اسپیشل فورس کے اہلکاروں کو انسانی بنیادوں پر معاملات طے کرنے کی تربیت دی گئی ہے، ان میں خواتین اہلکار بھی شامل ہیں۔ مسجد الحرام میں اسپیشل فورس تعینات کرنے کا مقصد عمرہ اور زیارت کیلئے آنے والوں کو ہر طرح کا تحفظ فراہم کرنا ہے۔سعودی عرب کے ایک مقامی آن لائن اخبار سبق نیوز کے مطابق بریگیڈیئر یحییٰ العقیل نے ذہنی مریضوں کے اہل خانہ سے اپیل کی ہے کہ وہ ان پر نظر رکھیں۔ یحییٰ العقیل نے مزید کہا کہ ان مریضوں کے اہل خانہ ان کو اس نیت سے حرم شریف لے جاتے ہیں کہ وہاں ان کی نفسیات پر اچھا اثر پڑے گا لیکن اہل خانہ کے عبادت میں مصروف ہونے کے بعد یہ مریض کبھی کبھار ہنگامہ برپا کردیتے ہیں۔انہوں نے کہا کہ مسجد الحرام میں ذہنی مریضوں کے حوالے سے سپیشل فورس تعینات کرنے کا محرک یہاں پیش آنے والے واقعات ہیں۔انھوںنے والدین سے اپیل کی کہ وہ بچوں کے ہاتھوں میں کڑے ڈالنے کا اہتمام کریں جن پر پتہ اور رابطے کا نمبر موجود ہو۔ اس سے گمشدہ بچوں کو والدین تک پہنچانے میں آسانی ہوتی ہے۔بریگیڈیئر یحییٰ العقیل نے بتایا کہ سکیورٹی فورس کے اہلکار حرم شریف کے صحنوں ، دالانوں اور تمام منزلوں میں تعینات کیے گئے ہیں۔
ان اہلکاروں میں سادہ لباس والے بھی ہیں۔انہوں نے واضح کیا کہ حرم شریف میں سکیورٹی اہلکاروں کو بہت سارے انتظامات دیئے گئے ہیں۔ یہاں آنے جانے کے عمل کو منظم کرنا ، تراویح کے بعد مسجد الحرام میں داخلے پر عارضی پابندی نافذ کرانا ، بوڑھوں اور مریضوں کو آنے جانے میں تعاون دینا اور راستہ بھول جانے والوںخصوصاً بچوں کی رہنمائی کرنا ہے۔
