بیروت، 24 فبروری (سیاست ڈاٹ کام) ہالی ووڈ کی سوپر سٹار انجلینا جولی نے لبنان میں شامی پناہ گزینوں کے کیمپوں کا دورہ کیا ہے۔ انہوں نے لبنان کے صوبہ بیکا میں قائم کیمپوں کا دورہ اقوام متحدہ کی پناہ گزینوں کیلئے ہائی کمشنر ہونے کے ناطے کیا ہے۔ تاہم جولی اس دورے کے دوران پاپا رازیوں سے بچی رہیں۔ جولی کے اس دورے کی میڈیا کوریج مشکل سے ہی ہوئی۔ اس کی ایک وجہ سکیورٹی کی صورت حال بتائی گئی ہے۔ اس لئے ان کے دورے کے انتظامات پر مامور ذمہ داروں نے میڈیا کوریج نہ ہونے دی۔ واضح رہے جولی ہفتے کے روز لبنان پہنچی تھیں۔ بیکا ریجن کے قصبے زالہے میں مقیم رہیں۔ یہ علاقہ شامی سرحد سے متصل ہے۔
اس علاقے میں تین لاکھ شامی مہاجرین پناہ گزین ہیں۔ جولی کے لبنان میں ترجمان جوئلے عید نے پہلے ہی بتا دیا تھا کہ جولی شامی خاندانوں سے ملاقات کریں گی۔ جولی نے اپنے دورے کے دوران مقامی کلچر کے مطابق اسکارف اوڑھ رکھا تھا۔ جولی یو این سی ایح آر کو 2012 ء میں خیر سگالی کی سفیر کا درجہ دیا گیا تھا۔ اس سے پہلے ہالی ووڈ کی یہ سوپر سٹار اردن کے زتاری کیمپ کا بھی دورہ کر چکی ہیں۔ اس کیمپ میں ایک لاکھ پچاسی ہزار پناہ گزین مقیم ہیں۔