متھرا، 21 اپریل (سیاست ڈاٹ کام) بالی ووڈ کی مشہور اداکارہ اور متھورا سے بھارتیہ جنتا پارٹی (بی جے پی) کی رکن پارلیمنٹ ہیمامالینی نے ملک بھر میں کمسن بچیوں کی عصمت ریزی اور قتل جیسے سنگین جرائم میں اچانک اضافے پر آج اپنی تشویش کا اظہار کرتے ہوئے کہا کہ اس سے ملک کی شبیہ بری طرح مجروح ہورہی ہے ۔ آج صبح یہاں بھگت سنگھ پارک سے ‘اسکول چلومہم’ کو ہری جھنڈی دکھانے کے بعد ہیمامالینی نے کہا کہ یہ مسئلہ انتہائی سنگین اور تشویشناک ہے اور ایسی جرائم کی لعنت کو روکنے کیلئے ضروری اقدام کیا جانا چاہئے۔ انہوں نے کہا: "ہماری حکومت ایسے جرائم کی روک تھام کے لئے عہد بند ہے اور بچیوں کی عصمت ریزی جیسے سنگین گناہوں میں ملوث مجرموں کے خلاف سخت قانون لانے کیلئے ہر ضروری اقدام کرے گی۔ہمیں بچوں اور ان کے والدین کی حفاظت یقینی بنانا ہے "۔ انھوں نے یہ بھی کہاکہ کسی بھی پروگرام میں شرکت کرتے وقت والدین کو اپنے بچوں کی نگہداشت کی ذمہ داری لینی چاہئے ۔
