بڈاپیسٹ۔ 21 اپریل ۔(سیاست ڈاٹ کام) عالمی ادارہ صحت کے مطابق ہنگری کے اس سائنسدان کیلئے خصوصی ویکسین روانہ کر دی گئی ہے ، جو اتفاقیہ طور پر ایبولا وائرس کی زد میں آگیا ہے ۔ ہنگری کے طبی ذرائع کے مطابق ریسرچر بڈاپیسٹ کی ایک لیبارٹری میں ایبولا وائرس کے نمونوں کی محفوظ پیکنگ میں مصروف تھا کہ حادثاتی طور پر وہ اس کی لپیٹ میں آ گیا۔ سائنسدان کے بیمار ہونے کے بعد ہنگری کی حکومت نے ورلڈ ہیلتھ آرگنائزیشن سے خصوصی ادویات کی فراہمی کی درخواست کی تھی۔ ہنگری کی حکومت نے سائنسدان کو فوری طور پر بڈاپیسٹ کے اسپتال کے ایک کمرے میں علاج کے لیے قرنطینہ میں رکھ دیا ہے ۔
