تہران۔25 جولائی ۔(سیاست ڈاٹ کام) ایرانی وزیر خارجہ محمد جواد ظریف نے امریکی حکام کی طرف سے بار بار سنگین نتائج کی دھمکیوں کومسترد کرتے ہوئے امریکیوں کوہوش کے ناخن لینے کامشورہ دیا ہے۔ اپنے ایک ٹوئٹر بیان میں محمد جواد ظریف نے کہاکہ ایران کے لیے کوئی نئی پریشانی والی بات نہیں، ہم نے ہزاروں برسوں پر مشتمل بادشاہتوں کا زوال دیکھا ۔ ایک بادشاہت ہمارے دور کی ہے جو ایک نہیں بلکہ کئی ملکوں میں پھیلی ہوئی ہے۔ اسے بھی اپنے بدتر انجام سے محتاط رہنا چاہیے کیونکہ زمین پر خدائی کا دعویٰ کرنے والے بڑے بڑے طاقتور بھی عبرتناک انجام سے دوچار ہوئے۔ ان کا اشارہ واضح طورپر امریکہ کی جانب تھا۔قبل ازیں امریکی صدر نے ٹوئٹرپر ایک بیان میں ایرانی صدر کو سنگین نتائج کی دھمکی دی تھی اور کہا تھا کہ اگر تم نے امریکہ کو دوبارہ دھمکی دی تو اس کے سنگین نتائج برآمد ہوں گے۔
