جینوا،19مئی( ( سیاست ڈاٹ کام ) اقوام متحدہ کے ہیومن رائٹس کونسل نے عالمی جنگی جرائم کے تفتیش کاروں کو فلسطین میں اسرائیلی فورسز کی فائرنگ سے جاں بحق ہونے والوں کی تحقیقات کے حق میں ووٹ دیا ہے۔ انسانی حقوق کونسل نے قرار داد پیش کی کہ فلسطین میں اسرائیلی جنگی جرائم کے حوالے سے فوری غیر جانبدار اور عالمی نوعیت کی تحقیقات کرائی جائے ۔ کونسل کے 47 اکان میں سے صرف دو رکن ممالک امریکہ اور آسٹریلیا نے قرارداد کی مخالف کی جبکہ 29 نے قرارداد کے حق میں ووٹ دیا ۔ برطانیہ، سوئزر لینڈ سمیت 14 ممالک غیر حاضر رہے۔ انسانی حقوق کونسل کے اعلامیہ میں کہا گیا کہ تفتیش کاروں کی ٹیم تمام خلاف ورزیوں اور زیادتیوں کی تحقیقات کریگی جو جنگی جرائم کے زمرے میں بھی آتے ہوں۔ اسرائیل کے خلاف 30 مارچ سے بڑے پیمانے پر فلسطین شہریوں کا احتجاج جاری ہے جس پر اسرائیلی فورسز کی فائرنگ کے نتیجے میں اب تک 60 شہری جاں بحق جبکہ 100 سے زائد زخمی ہو چکے ہیں۔فلسطینی پناہ گزینوں کا مطالبہ ہے کہ انہیں اپنے گھر جانے کا حق دیا جائے جو اب اسرائیل کی حدود میں آگئے ہیں، غزہ پٹی پر ہزاروں فلسطینیوں کے احتجاج اور اسرائیلی فورسز کے ساتھ جھڑپوں کے چھ ہفتے بعد اقوام متحدہ کا غیر معمولی اجلاس منعقد ہوا۔ یو این کے انسانی حقوق سربراہ زید رعد الحسین نے اسرائیلی فورسز کی جارحانہ عسکری کارروائیوں کی سخت مذمت کرتے ہوئے عالمی تحقیقات کا مطالبہ کیا۔انہوں نے کہا کہ 14 مئی کو اسرائیلی فورسز نے نہتے مظاہرین کی کمر، سینے اور سر پر گولیاں برسائیں۔
