اترپردیش ہندوستان کی نئی امید کا مرکز ، پرینکا گاندھی کے سیاست میں شمولیت کے بعد راہل گاندھی کا ٹوئیٹ ، پارٹی کارکنان میں خوشی کی لہر

by

نئی دہلی: کانگریس صدر راہل گاندھی نے بدھ کو اپنی بہن پرینکا گاندھی واڈرا کے سرگرم سیاست میں قدم رکھنے پر خوشی کا اظہار کرتے ہوئے کہا کہ اب وہ میرے ساتھ مل کر کام کریں گی۔

کانگریس صدر راہل گاندھی نے ٹوئٹ کرتے ہوئے کہا، ’’اتر پردیش ہندوستان کی نئی امیدوں کا مرکز ہے۔ پرینکا گاندھی اور جیوترادتیہ سندھیا کی قیادت میں اے آئی سی سی کی نئی ٹیم صوبہ میں نئی طرح کی سیاست کا آغاز کرے گی۔ ہم ریاست کو تبدیل کرنے کے لئے نوجوانوں کو ایک بہترین پلیٹ فارم مہیا کرائیں گے۔‘‘

پرینکا گاندھی کو کانگریس کا جنرل سکریٹری بنائے جانے کے ساتھ ہی پارٹی میں خوشی کی لہر دوڑ گئی اور انہیں مبارکباد پیش کرنے والوں کا تانتا لگ گیا۔ پرینکا گاندھی کے شوہر رابرٹ واڈرا، دہلی کانگریس کی صدر شیلا دیکشت، قد آور رہنما کپِل سبل، پارٹی کے سابق خزانچی موتی لال وورا سمیت کئی رہنماؤں نے پرینکا کی تقرری پر انہیں مبارکباد پیش کی۔

رابرٹ واڈرا نے پرینکا گاندھی کو کانگریس کا جنرل سکریٹری بنائے جانے پر مبارکباد پیش کرتے ہوئے کہا کہ ان کے سرگرم سیاست میں آنے سے کانگریسی کارکنان میں نیا جوش پیدا ہوگا اور کانگریس پارٹی کو اس کا فائدہ ملے گا۔

موتی لال وورا نے کہا ہے کہ پرینکا گاندھی کو ملنے والی ذمہ داری اہم ہے اور اس کا اثر صرف مشرقی اترپردیش پرہی نہیں ہوگا بلکہ دوسرے علاقوں پر بھی پڑے گا۔ دہلی کانگریس کی صدر اور سابق وزیر اعلی شیلا دیکشت نے اپنے تہنیتی پیغام میں کہا کہ پرینکا کا سیاست میں پہلے سے ہی اچھا خاصہ دخل رہا ہے۔

پارٹی کے قدآور رہنما راجیوشکلا نے پرینکا کی تقرری کو کانگریس کے صدر راہل گاندھی کا ماسٹر اسٹروک قرار دیا اور کہا کہ پرینکا واڈرا کے سرگرم سیاست میں آنے سے کانگریس کو نہ صرف اترپردیش میں فائدہ ہوگا بلکہ قومی سطح پر بھی اس کا فائدہ ملے گا۔