ٹوکیو۔7نومبر (سیاست ڈاٹ کام) جاپان کے وزیر اعظم شنزو آبے اور امریکی نائب صدر مائیک پینس کے درمیان 13 نومبر کو ایک ملاقات متوقع ہے جس میں دونوں رہنما جزیرہ نما کوریا کو نیوکلیئرہتھیار سے پاک بنانے کی سمت باہمی تعاون کے سلسلہ میں بات چیت کریں گے ۔حکومت جاپان کے ایک ترجمان نے منگل کو اس کی اطلاع دی۔مسٹر آبے اس ملاقات میں شمالی کوریا کی طرف سے جاپانی شہریوں کے اغوا کا مسئلہ اٹھائیں گے ۔جاپانی وزیر اعظم اس مسئلہ کو حل کرنے میں امریکی تعاون کا مطالبہ کر سکتے ہیں۔امریکی نائب صدر آسیان ممالک کی سالانہ کانفرنس میں حصہ لینے سے پہلے جاپان کا دورہ کریں گے ۔مسٹر پینس اس دوران جاپانی نائب وزیر اعظم اور وزیر خزانہ تارو آسو سے بھی ملاقات کریں گے۔نیوکلیئر امریکہ -جاپان کے درمیان ہونے والے مجوزہ تجارتی مذاکرات کی تیاریوں کو لے کر بھی بات چیت کریں گے ۔قابل غور ہے کہ سنگاپور میں اس سال 12 جون کو امریکی صدر ڈونالڈ ٹرمپ اور شمالی کوریا کے رہنما کم جونگ ان کے درمیان تاریخی چوٹی کانفرنس کے دوران شمالی کوریا نے امریکہ کے ساتھ ایک تاریخی سمجھوتہ کرکے جزیرہ نما کوریا سے نیوکلیئرہتھیار ختم کرنے کی سمت میں کام کرنے اور دونوں ممالک کے درمیان امن اور خوشحالی کے عزائم کا اظہار کیا تھا۔
