دبئی۔24 ڈسمبر (سیاست ڈاٹ کام )کرکٹ کی عالمی تنظیم انٹرنیشنل کرکٹ کونسل (آئی سی سی) نے ٹی ٹوئنٹی کی نئی درجہ بندی جاری کردی جس کے مطابق پاکستان پہلے نمبر پر بدستور موجود ہے۔ پاکستان کی گزشتہ ایک برس سے ٹی ٹوئنٹی کرکٹ میں شاندار کارکردگی جاری ہے اور رواں سال کے اختتام پر بھی اسے اس کا پھل مل گیا ہے۔آئی سی سی کی جانب سے جاری کی جانے والی نئی درجہ بندی کے مطابق پاکستان 138 نشانات کے بعد بدستور پہلے مقام پر فائزہے ۔سرِفہرست 10 ٹیموں میں ہندوستان 126 نشانات کے ساتھ دوسرے، انگلینڈ 118 نشانات کے ساتھ تیسرے، آسٹریلیا 117 نشانات کے ساتھ چوتھے اور جنوبی افریقہ 114 نشانات کے ساتھ پانچویں نمبر پر ہے۔اس کے علاوہ نیوزی لینڈ چھٹے، ویسٹ انڈیز ساتویں، افغانستان آٹھویں، سری لنکا نویں اور بنگلہ دیش دسویں نمبر ہے۔ بیٹنگ شعبے میں سرفہرست کھلاڑی پاکستان کے بابر اعظم ہیں جنہوں نے 858 نشانات کے ساتھ اپنا مقام برقرار رکھا ہے۔ پاکستان کے فخر زمان تنزلی کے بعد 5ویں نمبر پہنچ گئے ۔ بیٹنگ کی فہرست میں نیوزی لینڈ کے کولن منرو دوسرے اور آسٹریلیائی کپتان ایرون فنچ تیسرے نمبر پر موجود ہیں۔ بولنگ کے شعبے ٹی ٹوئنٹی جیسی تیز کرکٹ میں اسپن کا شعبہ کامیاب ہے جہاں سرِفہرست 10 بولروں میں 9 اسپنر شامل ہیں۔ افغانستان کے نوجوان لیگ اسپنر راشد خان بدستور پہلے نمبر پر موجود ہیں جبکہ پاکستان کے شاداب خان دوسرے، ہندوستان کے کلدیپ یادو تیسرے، انگلینڈ کے عادل رشید چوتھے اور آسٹریلیا کے ایڈم زمپا پانچویں نمبر پر ہیں۔علاوہ ازیں نیوزی لینڈ کے ایش سودھی چھٹے، بنگلہ دیش کے شکیب الحسن ساتویں، پاکستان کے فہیم اشرف آٹھویں، عماد وسیم نویں اور جنوبی افریقہ کے عمران طاہر دسویں نمبر پر ہیں۔آل راؤنڈرز کی فہرست میں آسٹریلیا کے گلین میکس ویل پہلے نمبر پر موجود ہیں جبکہ دوسرے پر بنگلہ دیش کے شکیب الحسن اور تیسرے پر افغانستان کے محمد نبی موجود ہیں۔
