فلاڈیلفیا، 13 مئی ( سیاست ڈاٹ کام) شطرنج کا کھیل صدیوں سے ایسے افراد کا کھیل رہا ہے جن کی ذہنی صلاحیتوں کا اعتراف دنیا بھر میں کیا جاتا ہے اور یہ کھیل کھیلنے والے افراد برسوں کی مشق کے بعد ہی خود کو ایک بہتر کھلاڑی کہلوانے میں کامیاب ہو پاتے ہیں۔ تاہم امریکہ میں ایک 11 سالہ لڑکی نے ’چیس ماسٹر‘ بن کر یعنی شطرنج کے ماہر ترین کھلاڑیوں میں اپنا نام لکھوا کر سب کو حیران کر دیا ہے۔ کریسا یِپ امریکہ کی تاریخ کے سب سے کمسن چیس ماسٹرز میں سے ایک ہے۔ نمائندہ برطانوی نشریاتی ادارہ نے جب ریاست فلاڈیلفیا میں ان سے ملاقات کی تو وہ شطرنج کے ایک مقابلے میں اپنے سے دوگنی عمر کے کھلاڑیوں کے مدِمقابل تھیں۔ کریسا کو بہت چھوٹی عمر میں ہی ان کے والد نے شطرنج کا کھیل سکھانا شروع کر دیا تھا۔ تاہم بات چیت میں وہ یہ طے نہیں کرپائے کہ کس عمر میں انھوں نے پہلی بار شطرنج کھیلی۔ فلاڈیلفیا کے مقامی کلب میں منعقدہ مقابلے میں کریسا بیک وقت بچھی 31 بساطوں پر کھیل رہی تھی۔ یعنی ایک طرف کریسا تو دوسری طرف 31 کھلاڑی۔ بہ یک وقت اتنی بازیاں کھیلتے ہوئے کریسا نے اپنی صلاحیتوں کا ثبوت دیا ۔ تاہم ماہر شطرنج ہونے کے باوجود کریسا کی عام زندگی دیگر بچوں کی مانند ہے۔ وہ عام بچے کی طرح اسکول جاتی ہے، ہوم ورک کرتی ہے اور اپنی سہیلیوں کے ساتھ کھیلتی بھی ہے۔
