غزہ ۔ 17 اپریل (سیاست ڈاٹ کام) اسلامی تحریک مزاحمت (حماس) کے سیاسی شعبے کے سینئر رکن خلیل الحیہ نے کہا ہیکہ مشرقی غزہ کی سرحد پر سب سے بڑا واپسی مارچ 15 مئی کو ہوگا اور اس موقع پر فلسطینی قوم صیہونی دشمن کی طرف سے مسلط کی گئی فرضی سرحدوں کو توڑ ڈالے گی۔ مرکز اطلاعات فلسطین کے مطابق غزہ میں تربیتی مشقوں کے دوران شہید ہونے والے اسلامی جہاد کے 4 کارکنوں کے حوالے سے منعقدہ تعزیتی اجتماع سے خطاب کرتے ہوئے خلیل الحیہ نے کہا کہ فلسطینی قوم اپنے ملک میں قائم کی گئی فرضی سرحدوں کو نہیں مانتی۔ 15 مئی کو مشرقی غزہ کی طرف لاکھوں فلسطینی مارچ کریں گے اور نام نہاد سرحد کو عبور کرکے واپس اپنے علاقوں میں جانے کیلئے تحریک چلائیں گے۔
