دوسرے ٹسٹ کے پہلے دن بنگلہ دیش ٹاس جیتنے کے بعد ناکام
ڈھاکہ (بنگلہ دیش ) ، 6 مئی (سیاست ڈاٹ کام) پاکستان نے یونس خان اور اظہر علی کی عمدہ سنچریوں کی بدولت بلند حوصلہ بنگلہ دیش کے خلاف دوسرے ٹسٹ میچ کے آج یہاں سے قریب میرپور کے شیربنگلہ نیشنل اسٹیڈیم میں پہلے دن تین وکٹ کے نقصان پر 323 رنز بنا لئے ہیں۔ دوسرے ٹسٹ میں مشفق الرحیم نے ٹاس جیت کر پہلے بیٹنگ کا فیصلہ کیا جو دن کے اختتام تک میزبانوں کیلئے کافی مہنگا ثابت ہوا۔ پاکستان نے میچ کیلئے ٹیم میں ایک تبدیلی کرتے ہوئے اسپنر ذوالفقار بابر کی جگہ فاسٹ بولر عمران خان ( جونیر ) کو موقع فراہم کیا ہے۔ پہلے بولنگ کا انتخاب بنگلہ دیش کیلئے مجموعی طور پر نقصان دہ ثابت ہوا۔ میچ کی دوسری ہی گیند کے بعد میزبان فاسٹ بولر شہادت حسین گھٹنے میں موچ کے سبب زخمی ہو کر پورے میچ سے باہر ہو گئے۔ 9 کے ٹیم اسکور پر گزشتہ میچ میں ڈبل سنچری بنانے والے محمد حفیظ (8) پویلین لوٹ گئے۔ اس کے بعد اظہر علی اور نوجوان اوپنر سمیع اسلم نے اسکور کو 58 تک پہنچایا لیکن سمیع 19 رنز بنانے کے بعد تاج الاسلام کی گیند پر کیچ ہوئے۔
اس کے بعد اظہر کو کریز پر تجربہ کار یونس خان کا ساتھ ملا اور دونوں کھلاڑیوں نے اسکور کو بتدریج آگے بڑھانا شروع کیا۔ اس دوران اظہر کافی خوش قسمت بھی رہے کیونکہ بنگلہ دیشی فیلڈرز ان کے کئی کیچس لینے میں ناکام رہے۔ اس دوران دونوں کھلاڑیوں نے اپنی، اپنی سنچری مکمل کی جبکہ اظہر نے ٹسٹ کرکٹ میں اپنے تین ہزار رنز بھی مکمل کر لئے۔ دونوں کھلاڑیوں کے درمیان تیسری وکٹ کیلئے 250 رنز کی شاندار شراکت قائم ہوئی، اور پھر یونس 148 رنز کی اننگز کھیلنے کے بعد پویلین لوٹے۔ انہوں نے تین چھکے اور گیارہ چوکے لگائے۔ جب پہلے دن کا کھیل ختم ہوا تو پاکستان نے مقررہ 90 اوورز کے کھیل 3.58 کی اچھی اوسط پر 323/3 اسکور کرلئے تھے۔ اظہر 127 اور کپتان مصباح الحق 9 کے انفرادی اسکور پر ناٹ آؤٹ ہیں۔ واضح رہے کہ دونوں ٹیموں کے درمیان دو ٹسٹ میچوں کی سیریز کا پہلا ٹسٹ میچ بغیر کسی نتیجے کے ڈرا ہو گیا۔