انقرہ۔ یکم اپریل (سیاست ڈاٹ کام)یورپی یونین کے رکن ممالک کی فضائی کمپنیوں کو ہدایت کی گئی ہے کہ وہ یمن کی فضائی حدود میں پروازوں سے گریز کریں۔ یورپی ریگولیٹرز کی جانب سے یہ ہدایت یمن میں حوثی شیعہ باغیوں کے خلاف سعودی عرب کی قیادت میں اتحادی ممالک کے فضائی حملوں کے بعد کی گئی ہے۔یورپی ایوی ایشن سیفٹی ایجنسی (ای اے ایس اے) نے فرانسیسی ریگولیٹرز کے بعد اپنی فضائی کمپنیوں سے کہا ہے کہ وہ دوران پرواز یمن کی فضائی حدود میں داخل ہونے سے گریز کریں۔ تاہم ای اے ایس اے نے یورپی یونین کے رکن 28 ممالک کی فضائی کمپنیوں پر یمن کی فضائی حدود میں پروازوں پر براہ راست پابندی عاید نہیں کی ہے مگر انھیں کہا ہے کہ وہ فرانسیسی فیصلے کو ملحوظ خاطر رکھیں۔یہ ایجنسی یورپی یونین کے تمام رکن ممالک میں شہری ہوابازی کو ریگولیٹ کرتی ہے۔ یورپی یونین کے غیر رکن ملک ترکی کی ملکیتی ترکش ائیرلائنز نے قبل ازیں استنبول سے یمن کیلئے اپنی پروازیں پانچ اپریل تک معطل کردی ہیں۔
