ماسکو۔7 جولائی (سیاست ڈاٹ کام)فرانس نے فیفا ورلڈکپ کے پہلے کوارٹر فائنل میں یوراگوئے کو 0-2 سے شکست دے کر 12 سال بعد سیمی فائنل میں رسائی حاصل کر لی ہے۔روس کے شہر نزنی نووگورڈ میں کھیلے گئے ایونٹ کے پہلے کوارٹر فائنل میچ 1998 کا ورلڈ کپ جیتنے والی فرانس اور دو مرتبہ کی سابق عالمی چیمپیئن یوراگوئے کی ٹیمیں مدمقابل تھیں۔میچ سے قبل ہی یوراگوئے کی ٹیم کو بڑا دھکا لگا اور گزشتہ میچ میں پرتگال کے خلاف دو گول اسکور کرنے والے ایڈنسن کوانی زخمی ہونے کے سبب میچ سے باہر ہو گئے۔میچ کے آغاز سے ہی دونوں ٹیموں نے ایک دوسرے کے خلاف جارحانہ انداز اپنایا اور گول کرنے کی کوششیں کیں لیکن فنشنگ نہ ہونے کے سبب ہاف کے ابتدائی حصے میں کوئی بھی ٹیم گول کرنے میں کامیاب نہ ہو سکی۔بالآخر فرانس کی ٹیم کو پہلی کامیابی اس وقت ملی جب میچ کے 40 ویں منٹ میں رافیل ویرین نے شاندار ہیڈر کے ذریعے گول کر کے اپنی ٹیم کو برتری دلائی جو پہلے ہاف کے اختتام تک برقرار رہی۔ہاف کے اختتام سے قبل مارٹن سیسیرس نے شاندار ہیڈر کے ذریعہ مقابلہ برابر کرنے کی کوشش کی لیکن وہ اس کاوش میں کامیاب نہ ہو سکے۔میچ کے دوسرے ہاف میں یوراگوئے کی ٹیم میچ میں واپسی کرسکتی تھی لیکن ان کے گول کیپر کی سنگین غلطی نے دو مرتبہ کی سابق چیمپیئن ٹیم کی امیدوں پر پانی پھیردیا۔اس کے بعد یوراگوئے نے نسبتاً جارحانہ انداز اپناتے ہوئے میچ میں واپسی کی کوشش کی اور اسی کوشش میں میچ کے اختتام سے 8 منٹ قبل فرانس کے کائلیان ایمباپے اور کرسٹین روڈریگوئز کے درمیان جھڑپ ہو گئی اور یہ معاملہ اس وقت مزید خراب ہو گیا جب یوراگوئے کے کپتان ڈیاگو گوڈن بھی اس جھڑپ کا حصہ بن گئے۔تاہم ریفری نے مداخلت کر کے معاملہ رفع دفع کرانے کے ساتھ ساتھ ایمباپے اور روڈریگوئز کو پیلا کارڈ دکھا دیا۔فرانس کی ٹیم 12سال بعد ورلڈ کپ کے سیمی فائنل کے لیے کوالیفائی کرنے میں کامیاب رہی۔ اس سے قبل آخری مرتبہ فرانسیسی ٹیم نے 2006 میں سیمی فائنل کھیلا تھا اور فائنل میں اسے اٹلی کے خلاف شکست ہوئی تھی۔
