قاہرہ ۔28مارچ۔(سیاست ڈاٹ کام) مصرنے یمن کی شہریت رکھنے والے افراد کی ملک میں داخلے کیلئے ویزے کی شرط لازمی قراردی ہے۔ قاہرہ بین الاقوامی ہوائی اڈے کے سکیورٹی حکام نے بتایا کہ یمن یا کسی بھی دوسرے ملک کی طرف سے قاہرہ آنے والے یمنی شہریوں کو مصری سفارت خانوں سے ویزہ حاصل کرنا ہوگا۔ اس کے بغیر کسی شخص کو مصرمیں داخل ہونے کی اجازت نہیں دی جائیگی۔ اس سے قبل یمنی شہریوں کیلئے مصر میں داخلے کی صورت میں ویزے کی شرط لازمی نہیں تھی تاہم یمن کے موجودہ حالات کے پیش نظر تا اطلاع ثانی ویزہ لازمی قرار دیا گیا ہے۔
