دبئی ۔17ستمبر (سیاست ڈاٹ کام) ایشیا کپ میں شائقین کرکٹ اور ماہرین کھیل کے بے تابی سے روایتی حریف ہندوستان اور پاکستان کے درمیان چہارشنبہ 19 ستمبر کو مقرر مقابلے کا انتظار ہے اور رمیز راجہ نے کہا ہے کہ یہ مقابلہ اعصاب اور معیار کا امتحان ہوگا ۔ہیڈ کوچ مکی آرتھر کے مطابق دباؤ میں مظاہرہ کرنے سے کھلاڑیوں کی صلاحیتوں کا بھی اندازہ ہوجاتا ہے اور پلیئرز کو ان میچز سے بہت کچھ سیکھنے کو ملتا ہے ، ایشیا کپ میں پاکستان اور ہندوستان کی ٹیموں کا دو مرتبہ مد مقابل ہونے واے ہیں اور اگر یہ دونوں ٹیمیں فائنل میں پہنچ گئیں تو پھر تیسرا میچ بھی شائقین کا منتظر ہوگا۔ ہند۔پاک مقابلے کی شائقین کے نقطہ نظر سے دلچسپی اپنی جگہ لیکن میدان میں اترنے والے کھلاڑیوں پر ان میچوں میں کتنا دباو ہوتا ہے اس کا اندازہ لگانا مشکل نہیں ہے تاہم پاکستانی کرکٹ ٹیم کے ہیڈ کوچ مکی آرتھر کے خیال میں یہ دباؤ کے میچز نوجوان کرکٹرز کو بہت کچھ سکھاتے ہیں۔ یہ مواقع ان نوجوان کرکٹرز کو اپنی صلاحیتوں کے اظہار کا ذریعہ اور تجربہ فراہم کرتے ہیں ۔ یہ بھی اندازہ ہوجاتا ہے کہ سخت دباو میں کونسے کرکٹرز مقابلہ کرسکتے ہیں اور کونسے کرکٹرز دباو برداشت نہیں کرسکتے،دوسری جانب سابق کپتان رمیز راجہ نے کہا ہے کہ پاکستان اور ہندوستان کے درمیان میچزمیں کرکٹرز کے اعصاب اور معیارکا امتحان ہوتا ہے۔
