دبئی۔21 جون(سیاست ڈاٹ کام) انٹرنیشنل کرکٹ کونسل نے 4 سالہ فیوچر ٹور پروگرام جاری کردیا جس کے مطابق پاکستان آسٹریلیا، نیوزی لینڈ، انگلینڈ اور سری لنکا سمیت دیگر ٹیموں کی میزبانی کرے گا تاہم اس میں ہندوستانی ٹیم شامل نہیں۔پروگرام کے مطابق پاکستان اکتوبر 2019 میں سری لنکا کی میزبانی کرے گا جس کے دوران 2 ٹسٹ میچز کھیلے جائیں گے اور اسی سال نومبر میں ٹیم آسٹریلیا کا دورہ کرے گی۔ دونوں ٹیموں کے درمیان 3 ٹی ٹوئنٹی اور 3 ٹسٹ میچز پر مشتمل سیریز کھیلی جائے گی۔2020 پاکستانی ٹیم کے لیے مصروف ترین سال ہوگا جس کے دوران پاکستان کئی ٹیموں کی نہ صرف میزبانی کرے گا بلکہ بیرونی دورے بھی مقرر ہیں۔جنوری 2020 میں پاکستان 3 ونڈے اور3 ٹی ٹوئنٹی میچز کے لئے سری لنکا کی میزبانی کرے گا جس کے بعد فروری 2020 میں پاکستان 2 ٹسٹ اور 3 ٹی ٹوئنٹی میچز کے لیے بنگلہ دیش کی میزبانی کرے گا۔جون 2020 میں انگلینڈ 3 ٹسٹ اور3 ٹی ٹوئنٹی میچز کے لیے پاکستان کی میزبانی کرے گا جبکہ ٹیم اسی ماہ آئرلینڈ کے خلاف بھی 2 ٹی ٹوئنٹی میچز کھیلے گی۔اکتوبر 2020 میں پاکستانی ٹیم 3 ٹی ٹوئنٹی اور 3 ون ڈے میچز کے لیے جنوبی افریقہ کا دورے گی جبکہ نومبر 2020 میں پاکستان زمبابوے کی میزبانی کرے گا جس کے دوران 3 ٹی ٹوئنٹی اور 3 ونڈے میچز کی سیریز کھیلی جائے گی۔دسمبر 2020 میں پاکستان ٹیم نیوزی لینڈ کا دورہ کرے گی جس کے دوران 2 ٹسٹ اور3 ٹی ٹوئنٹی میچز پر مشتمل سیریز کھیلی جائے گی۔2021 بھی ٹیم کے لیے مصروف ترین سال ثابت ہوگا جس کے دوران پاکستان جنوبی افریقہ، ویسٹ انڈیز اور نیوزی لینڈ کی میزبانی کرے گا اور اس سال ٹیم افغانستان، ویسٹ انڈیز، انگلینڈ اور زمبابوے کی مہمان بھی بنے گی۔ پاکستان فروری2021 میں 2 ٹسٹ اور 3 ٹی ٹوئنٹی میچز کے لیے جنوبی افریقہ کی میزبانی کرے گا اور اپریل میں ٹیم زمبابوے کا دورہ کرے گی جس کے دوران 2 ٹسٹ اور 3 ٹی ٹوئنٹی میچز پر مشتمل سیریز کھیلی جائے گی۔جولائی 2021 میں پاکستان ٹیم 3 ون ڈے اور 3 ٹی ٹوئنٹی میچز کھیلنے انگلینڈ جائے گی اور اگست میں ویسٹ انڈیز کے دورے کے دوران ٹیم 3 ٹی ٹوئنٹی اور 3 ٹسٹ میچز پر مشتمل سیریز کھیلے گی۔ستمبر 2021 میں پاکستان ٹیم 3 ون ڈے میچز کے لیے افغانستان کی مہمان بنے گی اور دسمبر میں ویسٹ انڈیز کے دورے کے دوران 3 ون ڈے اور 3 ٹی ٹوئنٹی میچز کھیلے گی۔
