پرتھ۔13 ڈسمبر(سیاست ڈاٹ کام )مڈل آرڈر بیٹسمین روہت شرما، آف اسپنر روی چندرن اشون اور چائنا مین بولر کلدیپ یادو کو کل یہاں آسٹریلیا کے خلاف پرتھ میں کھیلے جانے والے دوسرے کرکٹ ٹسٹ کے لئے ہندستانی کرکٹ ٹیم سے باہر رکھا گیا ہے ۔ وہیں اوپنر اور نوجوان پرتھوی شا بھی چوٹ سے نجات حاصل نہیں کر پائے ہیں اور دوسرے ٹسٹ میں نہیں کھیل سکیں گے ۔ پریکٹس میچ کے دوران زخمی ہونے کی وجہ سے پرتھوی پہلے میچ میں بھی نہیں کھیل سکے تھے ۔ ہندستانی کرکٹ کنٹرول بورڈ (بی سی سی آئی) نے آج پرتھ ٹسٹ کے لئے اپنی 13 رکنی ٹیم کا اعلان کیا ہے جس میں اشون، روہت اور شا کے زخمی ہونیکی وجہ سے دوسرے میچ میں شامل نہ ہونے کی اطلاع دی گئی ہے ۔کلائی کے اسپنر کلدیپ کو پرتھ اسٹیڈیم میں فاسٹ بولروں کے لیے مددگار وکٹ کو ذہن میں رکھتے ہوئے آخری الیون سے باہر رکھا گیا ہے ۔آل راؤنڈر رویندر جڈیجہ کی ماہر اسپنر اور آل راؤنڈر کے طور پر ٹیم میں واپسی ہوئی ہے جبکہ امیش یادو اور بھونیشور کمار کو فاسٹ بولنگ کا کام سونپا گیا ہے جو اڈیلیڈ ٹسٹ سے باہر رہے تھے ۔اڈیلیڈ اوول میں چھ وکٹ نکالنے والے اشون کو پیٹ کے پٹھوں میں کھنچاؤ ہے اور پرتھ میں نہیں کھیل سکیں گے جبکہ روہت کو پیٹھ کے نچلے حصے میں فیلڈنگ کے دوران چوٹ لگ گئی تھی اور فی الحال ان کا علاج چل رہا ہے ۔ شا کو سیریز سے پہلے پریکٹس کے دوران ٹخنے میں چوٹ لگی تھی۔ہندستان نے اڈیلیڈ ٹسٹ31 رنز سے جیتنے کے بعد چار میچوں کی سیریز میں1-0 کی برتری بنائی تھی، اس سبب ہندستان کو آسٹریلیا کے خلاف اڈیلیڈ ٹیسٹ میں کامیابی حاصل کرنے والی ٹیم میں کم از دو تبدیلیاں لازمی کرنی ہوں گی ۔ ہندستان اور آسٹریلیا کے درمیان چار ٹسٹ میچوں کی سیریز کا دوسرا ٹسٹ میچ جمعہ سے 18 دسمبر تک پرتھ کے مقام پر کھیلا جائے گا۔ تیسرا ٹسٹ میچ 26 سے 30 دسمبر تک میلبورن میں جبکہ دونوں ٹیموں کے درمیان سیریز کا چوتھا اور آخری ٹسٹ میچ 3 سے 7 جنوری 2019 تک سڈنی میں کھیلا جائے گا۔ دونوں ٹیموں کے درمیان تین ونڈے انٹرنیشنل میچوں کی سیریز کا پہلا میچ 12 جنوری 2019کو سڈنی میں کھیلا جائے گا۔ دوسرا ون ڈے میچ 15 جنوری کو اڈیلیڈ میں کھیلا جائے گا جبکہ دونوں ٹیموں کے درمیان تیسرا اور آخری میچ 18 نومبر کو میلبورن میں کھیلا جائے گا۔ ونڈے بین الاقوامی میچوں کی سیریز کے تینوں میچ ڈے اینڈ نائٹ ہوں گے ۔ دریں اثناء پرتھ ٹسٹ کے لئے ٹیم اس طرح ہے : ویراٹ کوہلی (کپتان)، مرلی وجے ، لوکیش راہول، چتیشور پجارا، اجنکیا رہانے ، ہنوما وہاری، رشبھ پنت (وکٹ کیپر)، رویندر جڈیجہ، ایشانت شرما، محمد سمیع، جسپریت بمراہ، بھونیشور کمار اور امیش یادو۔علاوہ ازیںپرتھ ٹسٹ کے لئے جو وکٹ تیار کی گئی ہے وہ نہ صرف نئی ہے بلکہ وہ کافی ہری ہے جس پرفاسٹ بولروں کیلئے حالات سازگار ہونے کے ساتھ اچھا ل سے بھی وہ بیٹسمینوں کو پریشان کرسکتے ہیں۔وکٹ کا معائنہ کرنے کے بعدہندوستانی کرکٹ ٹیم کے کپتان ویراٹ کوہلی نے کہا ہے کہ وکٹ دیکھنے کے بعدہم کافی پرجوش ہیں ۔انہوں نے مزید کہا وکٹ کے کیوریٹربریٹ سیپ تھروپ نے ایک جاندار اور اچھال لینے والی وکٹ تیار کی ہے جوکہ میزبان ٹیم سے زیادہ ہمارے لئے بھی سازگار ہوگی کیونکہ ہمارے پاس قابل فاسٹ بولرس موجود ہیں جن میں امیش اور کمار کی واپسی بھی قابل ذکر ہے۔کوہلی نے مزید کہا ہے کہ وہ وکٹ کے برتاؤ سے زیادہ مقابلے میں کامیابی کے ساتھ سیریز میں 2-0 کی سبقت حاصل کرنے پر اپنی تمام تر توجہ مرکوز کرچکے ہیں۔وہاری بیٹسمین ہونے کے علاوہ آف اسپین بولنگ بھی ڈالتے ہیں۔
