دبئی ۔29 جنوری (سیاست ڈاٹ کام )کرکٹ کی عالمی تنظیم انٹرنیشنل کرکٹ کونسل (آئی سی سی) نے ٹی20 ورلڈ کپ 2020 کے شیڈول کا اعلان کردیا۔مرد زمرے کے ورلڈ کپ میں ہندوستانی ٹیم کا پہلا مقابلے جنوبی افریقہ سے 24 اکٹوبر کو آسٹریلیا کے شہر پرتھ میں ہوگا جبکہ خواتین کے ورلڈ کپ میں ہندوستانی ٹیم کا پہلا مقابلا دفاعی چمپئین آسٹریلیا کے خلاف 21 فروری کو سڈنی میں ہوگا۔آئی سی سی کی جانب سے آئندہ برس آسٹریلیا میں کھیلے جانے والے مردوں اور خواتین کے ٹی ٹوئنٹی ورلڈ کپ کے الگ الگ شیڈول کا اعلان کیا۔ مردوں کے ٹی ٹوئنٹی ورلڈ کپ کا آغاز 18 اکتوبر کو ہوگا اور یہ 15 نومبر تک جاری رہے گا، جہاں جملہ 16 ٹیمیں 45 میچز کھیلیں گی۔ آسٹریلیا میں ہونے والے ٹی ٹوئنٹی ورلڈ کپ کے میچز 7 شہروں سڈنی، میلبورن، ایڈیلیڈ، پرتھ، ہوبارٹ، برسبین اور جیولانگ میں کھیلے جائیں گے۔ ابتدائی طور سری لنکا اور بنگلہ دیش سمیت 6 ٹیمیں راؤنڈ ون کھیلیں گی، جن میں سے 4 ٹیمیں سوپر 12 کے لیے کوالیفائی کریں گی۔ جس کے بعد ایونٹ کا باقاعدہ آغاز 24 اکتوبر کو سوپر 12 مرحلے سے ہوگا جہاں پہلا میچ آسٹریلیا اور پاکستان کے درمیان کھیلا جائے گا۔ سوپر 12 مرحلے میں ٹیموں کو 2 گروپس میں تقسیم کیا گیا ہے اور روایتی حریف پاکستان اور ہندوستان کو الگ الگ گروپ میں رکھا گیا ہے۔ گروپ اے میں پاکستان، آسٹریلیا، نیوزی لینڈ، ونڈیز (ویسٹ انڈیز) اور2 کوالیفائر شامل ہوں گے جبکہ گروپ بی میں ہندوستان، جنوبی افریقہ، انگلینڈ، افغانستان اور 2 کوالیفائر ہوں گے۔2018 کا ٹی ٹوئنٹی ورکپ کپ جیتنے والی ویسٹ انڈیز کی ٹیم خطاب کا دفاع کرنے کے لیے 25 اکتوبر 2020 کو نیوزی لینڈ سے ٹکرائے گی۔ مردوں کے ٹی ٹوئنٹی ورلڈ کپ کا پہلا سیمی فائنل11 نومبر کو سڈنی کرکٹ گراؤنڈ میں جبکہ دوسرا سیمی فائنل 12 نومبر کو ایڈیلیڈ اول میں کھیلا کائے گا۔ ایونٹ کا فائنل اتوار 15 نومبر 2020 کو دنیا کے سب سے بڑے میدان میلبورن کرکٹ گراؤنڈ میں کھیلا جائے گا۔علاوہ ازیں آئی سی سی نے مردوں کے ساتھ خواتین ٹی 20 ورلڈ کپ 2020 کے شیڈول کا بھی اعلان کردیا۔ آسٹریلیا میں کھیلے جانے والے اس ٹی ٹوئنٹی ورلڈ کپ کا باقاعدہ آغاز 21 فروری کو ہوگا اور یہ 8 مارچ 2020 تک جاری رہے گا۔ ایونٹ میں دنیا بھر سے 10 بہترین خاتون ٹوئنٹی20 ٹیمیں شرکت کریں گی جبکہ میزبان آسٹریلیا خطاب کا دفاع کرے گی۔ ویمن ٹی ٹوئنٹی ورلڈ کپ کے آغاز سے قبل 15 سے 20 فروری کے دوران ایڈیلیڈ اور برسبین میں وارم اپ میچز بھی کھیلے جائیں گے۔ خواتین کرکٹ کے عالمی میلے کے 23 میچز آسٹریلیا کے 6 شہروں میں کھیلے جائیں گے، جس کے لیے ٹیموں کو 2 گروپس میں تقسیم کیا گیا ہے۔ مردوں کے ٹی ٹوئنٹی ورلڈ کپ کی طرح اس میں بھی روایتی حریف پاکستان اور ہندوستان کو الگ الگ گروپس میں رکھا گیا ہے۔ گروپ اے میں آسٹریلیا، ہندوستان، نیوزی لینڈ، سری لنکا اور ایک کوالیفائر شامل ہیں جبکہ گروپ بی میں پاکستان، جنوبی افریقہ، ونڈیز (ویسٹ انڈیز) ، انگلینڈ اور ایک کوالیفائر شامل ہوں گی۔ ویمن ٹی ٹوئنٹی کا پہلا اور دوسرا سیمی فائنل 5 مارچ کو سڈنی کرکٹ گراؤنڈ میں کھیلا جائے گا جبکہ ایونٹ کا فائنل 8 مارچ کو میلبورن کے تاریخی اسٹیڈیم میں ہوگا۔واضح رہے کہ ویمن ٹی ٹوئنٹی ورلڈ کپ کا فائنل 8 مارچ کو خواتین کے عالمی دن کے موقع پر رکھا گیا ہے اور یہ خواتین کے کھیلوں میں شائقین کی موجودگی کا نیا عالمی ریکارڈ بنانے کا موقع ہوگا۔
