دبئی۔18 اگسٹ (سیاست ڈاٹ کام ) ایشیا کپ کے انعقاد کی راہ میں حائل مسئلہ حل ہوگیا کیونکہ بی سی سی آئی نے میگا ایونٹ کی میزبانی کے حقوق عرب امارات کرکٹ بورڈ کے حوالے کردئے ہیں۔ بی سی سی آئی کی جانب سے اس متعلق صحافتی بیان جاری کیا گیا۔ ٹورنامنٹ 15 تا 28 ستمبر دبئی اور ابوظبی میں کھیلا جائے گا جس میں ہندوستان، پاکستان، سری لنکا، بنگلہ دیش اور افغانستان کے ساتھ اے سی سی کوالیفائنگ ایونٹ کی چمپئن شپ کی فاتح ٹیم شرکت کرے گی۔ بی سی سی آئی کے مطابق اماراتی حکام کے ساتھ میزبانی سے متعلق معاہدے پر دستخط ہوگئے ہیں۔ یاد رہے کہ ٹورنمنٹ کا میزبان ہندوستان تھا لیکن پاکستان کی جانب سے ویزا اور سیکورٹی مسائل کے حوالے سے تحفظات ظاہر کیے گئے تھے جس کے بعد رواں برس کے اوائل میں ایشین کرکٹ کونسل نے میزبانی حقوق ہندوستان کو ہی دیتے ہوئے ایشیا کپ کو یواے ای منتقل کردیا تھا۔ بورڈکے قائم مقام سیکریٹری امیتابھ چودھری نے کہا ہے کہ ہم بی سی سی آئی کی جانب سے ایشیا کپ کی میزبانی کرنے پر امارات کے شکر گذار ہیں، یقین ہے کہ کرکٹ شائقین کو بہترین کھیل دیکھنے کو ملے گا۔علاوہ ازیں بورڈ کی جانب سے اس بات کی وضاحت نہیںکی گئی کہ ٹورنمنٹ کے منافع سے دونوں بورڈز میں کس طرح تقسیم کی جائے گی۔ افتتاحی میچ دبئی میں 15 ستمبر کو سری لنکا اور بنگلہ دیش کے درمیان کھیلا جائے گا۔ پاکستان اور ہندوستان کی ٹیمیں 19 ستمبر کو مدمقابل ہوں گی۔
