لاہور۔19 نومبر (سیاست ڈاٹ کام ) پاکستان ہاکی ٹیم کے کپتان رضوان سینئر نے بھی ورلڈ کپ میں غیر معمولی کھیل پیش کرنے کا عزم ظاہر کرتے ہوئے کہا ہے کہ ورلڈ کپ کے لئے تیاریاں بھر پور انداز میں جاری ہیں، میگا ایونٹ کے دوران یکجان ہو کر کھیلیں گے اور اچھی کارکردگی دکھا کر وطن واپس لوٹیں گے۔ ہاکی ٹیم کے کپتان رضوان سینئر نے کہا کہ کوئی کھلاڑی بھی یہ نہیں چاہتا کہ وہ برا کھیلے، سب اچھے کے لئے ہی کھیلتے ہیں جب کہ ایشینز گیمز کی غلطیوں سے سبق سیکھ کر پاکستان نے ایشین چیمپئنز ٹرافی کاخطاب اپنے نام کرنے میں کامیاب رہے۔ رضوان سینئر نے کہا کہ ورلڈ کپ کی تیاریاں بھر پور انداز میں جارہی ہیں، توقیر ڈار کے بطور ہیڈ کوچ کے آنے سے کھلاڑیوں کو بہت کچھ سیکھنے کو مل رہا ہے، کھلاڑیوں کی فٹنس پر بھی خاص کام کیا جا رہا ہے، پر امید ہوں کہ پاکستانی ٹیم ورلڈ کپ میں بہترین کارکردگی کا مظاہرہ کرنے میں کامیاب رہے گی۔ ایک سوال پر کپتان نے کہا کہ ہندوستان میں جا کر کھیلنے کا کوئی دباؤ نہیں، ہماری توجہ صرف اور صرف اپنے گھیلپر مرکوزہوگی، مجھ سمیت ہر کھلاڑی کی خواہش ہے کہ ہمسایہ ملک میں اپنے کیریئر کی بہترین کارکردگی دکھا کر ملک وقوم کا نام روشن کریں۔یاد رہے کہ ورلڈ کپ ہندوستان میں کھیلا جارہا ہے ۔
