مسقط ۔28 اکٹوبر (سیاست ڈاٹ کام ) ایشین چمپیئنز ٹرافی ہاکی ٹورنمنٹ کے دوسرے سیمی فائنل میں ہندوستان نے جاپان کو 2۔3 سے شکست دیکر فائنل میں رسائی حاصل کرلی ہے جہاں اس کا مقابلہ رواتی حریف پاکستان سے ہوگا۔قبل ازیں پہلے سیمی فائنل میں پاکستان نے ملائیشیا کو سنسنی خیز مقابلے کے بعد پینالٹی شوٹ آؤٹ پر شکست دے کر فائنل میں پہنچنے کا اعزاز حاصل کر لیا۔ مسقط میں کھیلے گئے میچ میں پاکستان اور ملائیشیا نے شروع سے ہی جارحانہ کھیل پیش کیا خصوصاً پاکستان نے ملائیشیا کے خلاف ابتدائی ہاف میں عمدہ کھیل پیش کر کے 4 گول اسکور کئے لیکن اپنی برتری برقرار رکھنے میں ناکام رہا۔میچ کے پہلے کوارٹر کے اختتام سے قبل ابو محمود کے گول کی بدولت پاکستان نے 1۔3 کی برتری حاصل کر لی۔ میچ کے دوسرے کوارٹر میں بھی پاکستان نے عمدہ کھیل پیش کیا اور علیم بلال نے میچ کے 20ویں منٹ میں اپنا دوسرا گول اسکور کردیا۔ پہلے ہاف کے اختتام سے قبل ملائیشیا نے گول اسکور کر کے پاکستان کی برتری کو کم کردیا لیکن ہاف ٹائم پر پاکستان کو 1-4 کی برتری حاصل تھی۔ دوسرے ہاف میں پاکستان کے دفاع کی غلطیوں اور حریف ٹیم کے تیز کھیل کے سبب ٹیم بے بس نظر آئی اور ملائیشیا نے صرف ایک منٹ میں دو گول اسکور کر کے میچ میں شاندار انداز میں واپسی کی۔ میچ کے 43ویں منٹ میں ٹینگو تاج الدین نے ری باؤنڈ پر گول کیا جبکہ ایک ہی منٹ کیاندر ایمن روزیمی نے گول داغ کر کے اسکور 3-4 کردیا۔ملائیشیا کی جانب سے پہلا گول اسکور کرنے والے فیصل ساری نے میچ کے اختتام سے 4 منٹ قبل پینالٹی پر گول اسکور کر کے مقابلہ 4۔4 سے برابر کردیا۔ مقابلہ برابر رہنے کے بعد شوٹ آؤٹ پر میچ کا فیصلہ ہوا جس پر پاکستان نے 1-3 سے کامیابی حاصل کرکے لگاتار پانچویں مرتبہ ایشین چیمپیئنز ٹرافی کے فائنل میں پہنچنے کا اعزاز حاصل کر لیا۔
