لندن۔ 23 ستمبر (سیاست ڈاٹ کام)پاکستانی ٹیم کے سابق کپتان اور مایہ ناز بلے باز یونس خان نے انگلینڈ میں اپنی ٹیم کی فتوحات میں لیگ اسپنرز کو ٹرمپ کارڈ قرار دیتے ہوئے ہندستانی بلے بازوں کو مشورہ دیا ہے کہ وہ اپنی بیٹنگ میں بہتری کیلئے عظیم کھلاڑیوں سے مشورے لیا کریں۔ایک نجی ٹی وی سے گفتگو کرتے ہوئے ہندستانی ٹیم کی انگلینڈ میں مسلسل شکست کے حوالے سے سوال پر یونس نے ہندستانی بلے بازوں کو مشورہ دیا کہ وہ سنیل گواسکر، اظہر الدین اور ظہیر عباس جیسے عظیم کھلاڑیوں سے مشورے لیا کریں کیونکہ سیکھنے کا عمل رکنا نہیں چاہیے ۔اس موقع پر انہوں نے اپنی مثال پیش کرتے ہوئے کہا کہ دورہ انگلینڈ کے دوران میں صحیح سے کھیل نہیں پا رہا تھا تاہم اظہر الدین نے کال کر کے میری غلطی کی نشاندہی کی اور میں نے ان کے مشورے پر عمل کرتے ہوئے کامیابی حاصل کی۔یونس نے اپنے کیریئر کا ایک اور اہم واقعہ بتاتے ہوئے کہا کہ 2004 کی چمپئنز ٹرافی کے دوران میں نے عظیم ہندستانی بلے باز راہل دراوڑ سے درخواست کی کہ مجھے آپ کے پانچ منٹ درکار ہیں اور مجھے اس وقت کافی حیرت ہوئی جب راہل دراوڑ خود مجھ سے بات کرنے میرے کمرے تک آ گئے ۔انہوں نے کہا کہ دراوڑ سے کچھ دیر بات کی تو انہوں نے مجھے چند نصیحتیں کیں جن پر عمل کرتے ہوئے 2004 کے بعد میرا کیریئر بالکل تبدیل ہو گیا لہٰذا اگر یہ ان عظیم کھلاڑیوں سے مشورے لیں گے تو ہندستانی ٹیم کبھی بھی انگلینڈ میں جدوجہد نہیں کرے گی۔واضح رہے کہ ہندستانی ٹیم کو اپنے گزشتہ دونوں دورہ انگلینڈ میں شکست کا سامنا کرنا پڑا جہاں 2014 میں انگلینڈ نے پانچ ٹیسٹ میچوں کی سیریز میں 1-3 سے شکست دی تھی جبکہ 2018 میں ہونے والی سیریز میں 1-4 سے زیر کیا تھا۔
