اینٹورپ، 6 جولائی (سیاست ڈاٹ کام) ہاکی ورلڈ لیگ کے فائنل میں آسٹریلیا نے سنسنی خیز مقابلے کے بعد بلجیم کو 1-0 سے شکست دے کر ٹائٹل جیت لیا۔ میچ میں آسٹریلیائی کھلاڑی کیرن گوورز نے گول ہونے کے بعد خود اپنے فاؤل کو تسلیم کر کے ’اسپورٹس مین اسپرٹ‘ کی نئی مثال قائم کر دی۔ بلجیم کے شہر اینٹورپ میں منعقدہ ہاکی ورلڈ لیگ کے فائنل میں بلجیم کی ٹیم نے پورے میچ میں عالمی چمپئن آسٹریلیا کا ڈٹ کر مقابلہ کیا۔ میچ ختم ہونے سے تین منٹ قبل آسٹریلیا کے گوورز نے گول ہونے کے بعد خود ہی اپنا فاؤل تسلیم کر کے کھیل کے حقیقی جذبہ کی اعلیٰ مثال قائم کی۔ اس موقع پر میچ کے ایکسٹرا ٹائم میں جانے کے امکانات پیدا ہونے لگے تھے لیکن میچ ختم ہونے سے صرف چار سکنڈ قبل آسٹریلیا کو پنلٹی کارنر ملا جس پر کرس کیریلو نے گول کرکے ٹائٹل آسٹریلیا کے نام کردیا۔ ادھر اولمپک کوالیفائنگ راؤنڈ ہاکی ورلڈ لیگ میں تیسری پوزیشن کے میچ میں برطانیہ نے ہندوستان کو 5-1 کے بھاری فرق سے شکست دے دی۔ تیسری پوزیشن کے میچ میں برطانوی ٹیم ابتداء ہی سے ہندوستانی ٹیم پر حاوی رہی اور جارحانہ کھیل سے ہندوستانی ٹیم کی تمام تر حکمت عملی ناکام بنا دی۔ برطانیہ نے میچ کے پہلے کوارٹر میں ایک گول کر کے برتری حاصل کی جسے تیسرے اور چوتھے کوارٹر میں دو، دو گول اسکور کر کے مستحکم کر لیا۔ برطانیہ کی جانب سے ایلسٹر بروگ ڈون، ایشلے جیکسن، ایڈم ڈکسن اور بیری میڈلیٹن نے گول کئے جبکہ ہندوستان کی جانب سے میچ کا واحد گول روپریندر سنگھ نے آخری منٹ میں کیا۔ اس میچ میں فتح کے ساتھ ہی برطانیہ نے ایونٹ میں تیسری اور ہندوستان نے چوتھی پوزیشن حاصل کی۔
پاکستانی ہاکی ٹیم ساتویں پوزیشن سے بھی محروم
قبل ازیں پاکستان ہاکی ٹیم کی تنزلی کا سفر جاری رہا اور اولمپکس سے باہر ہونے کے بعد ’’گرین شرٹس‘‘ ہاکی ورلڈ لیگ میں فرانس سے ساتویں پوزیشن کے میچ میں بھی شکست کھا گئے۔ اینٹورپ میں کھیلے گئے میچ میں فرانس کے سائمن مارٹن نے 13ویں منٹ میں گول کر کے ٹیم کو برتری دلادی۔ دوسرے کوارٹر کے اختتام سے چند لمحے قبل میچ کے تیسویں منٹ میں ہوگو گینسٹیٹ نے گول کرکے فرانس کی برتری کو 2-0 کردیا۔ پاکستان کی جانب سے محمد توثیق نے گول کرکے خسارہ 1-2 کیا۔ تاہم پاکستانی ٹیم مزید کوئی گول کرنے میں ناکام رہی اور فرانس نے میچ 2-1 سے جیت لیا۔ ہاکی ورلڈ لیگ میں پاکستانی ٹیم صرف ایک میچ جیت سکی اور آٹھویں پوزیشن پر آنے کے بعد آئندہ سال ہونے والے ریو ڈی جنیرو اولمپکس میں شرکت سے محروم ہو گئی ہے۔
