فورٹالیزا (برازیل)۔22 جون (سیاست ڈاٹ کام)ورلڈ کپ 2014 ء کے گروپ جی میں جرمنی اور گھانا کے درمیان مقابلہ برابری پر ختم ہوگیا ہے۔دو میچوں میں جرمنی نے 4 پوائنٹس حاصل کر لیے ہیں۔ اگلے میچ میں فتح کی صورت میں جرمنی دوسرے ہاف کے لیے کوالیفائی کر لے گا۔ جرمنی کا اب امریکہ سے مقابلہ ہوگا۔گھانا نے جو پہلے میچ میں امریکہ سے 2-1 سے ہار گیا تھا اس میچ کے ابتدا سے ہی عمدہ کھیل پیش کیا۔ پہلے ہاف کے اختتام پر میچ برابر تھا۔ پہلے ہاف میں گھانا کی ٹیم جرمنی سے قدرے بہتر کھیلی اور جرمنی کے گول پر کئی حملے کیے جو کامیاب نہ ہو سکے۔دوسرے ہاف میں دونوں ٹیموں نے انتہائی شاندار کھیل کا مظاہرہ کیا اور ایک دوسرے کے گول پر یکے بعد دیگرے تابڑ توڑ حملے کئے اور تماشائیوں کے دل موہ لیے۔دوسرے ہاف کے پہلے 10 منٹوں میں جرمنی کے نوجوان کھلاڑی کوٹسر نے مولر کے پاس پر گول کر کے جرمنی کو برتری دلا دی لیکن گھانا نے صرف 3 منٹوں میں نہ صرف اس برتری کو ختم کر دیا بلکہ دوسرا گول کر کے جرمنی پر برتری حاصل کر لی۔گھانا کی طرف سے پہلا گول آئیو نے ایک خوبصورت ہیڈر کے ذریعہ کیا جبکہ دوسرا گول سولے منتاری نے کیا۔ 36 سالہ کلاؤز نے ورلڈ کپ میں 15 گولوں کا برازیلی رونالڈو کا ورلڈ ریکارڈ برابر کر دیا ہے۔ جرمنی نے گھانا کی طرف سے دوسرا گول کرنے کے بعد ٹیم میں تبدیلی کی اور پہلا گول اسکور کرنے والے نوجوان گوٹسر کو واپس بلا کر 36 سالہ کلاؤز کو میدان میں بھیجا جس نے میدان میں آنے کے ایک منٹ کے اندر گول کر کے ٹیم کو برابری پر لا کھڑا کیا۔دونوں ٹیمیں آخری منٹ پر ایک دوسرے کے گول پر حملے کرتی رہیں۔اس میچ میں دو بھائی مخالف ٹیموں کی نمائندگی کر رہے تھے۔کیون پرنس بوٹنگ نے گھانا کی نمائندگی کی جبکہ ان کے بھائی جروم بوٹنگ جرمنی کی ٹیم کا حصہ تھے۔
