لندن ۔10 ستمبر(سیاست ڈاٹ کام) انگلینڈ کے سابق کپتان مائیکل وان نے ویراٹ کوہلی پر تنقید کرتے ہوئے کہا کہ کوہلی دنیا کے نمبر ایک بیٹسمین ہیں لیکن ریویو لینے کے معاملے میں وہ دنیا کے ناکام کھلاڑی ہیں۔اوول ٹسٹ کے دوران ہندوستانی کپتان وراٹ کوہلی نے 10 ویں اوور میں جیننگس اور 12 ویں اوور میں السٹر کک کے خلاف ریویو لیا اور دونوں ہی موقع پر فیصلہ ٹیم کے خلاف گیا۔اس موقع پر سابق انگلش کپتان مائیکل وان نے ٹوئیٹر پر کہا کہ ویراٹ دنیا کے نمبر ایک بیٹسمین ہیں، لیکن ریویو لینے کے معاملے میں وہ دنیا بھر میں سب سے ناکام کھلاڑی ثابت ہو رہے ہیں۔ کرکٹ مبصرین کی جانب سے انہیں ریویو لینے کے معاملے میں بالکل زیرو بتایا جا رہا ہے۔ کوہلی کو ریویو کے معاملے میں وکٹوں کے پیچھے دھونی کی کمی کا احساس ہو رہا ہے ، کیونکہ دھونی ایک ونڈے میں وکٹ کیپر ہوتے ہیں اور ہر ڈی آر ایس فیصلے میں ان کا بڑا ہاتھ ہوتا ہے ،یہی وجہ ہے کہ ونڈے میچوں میں کوہلی ہر ڈی آر ایس فیصلہ لینے کیلئے دھونی پر اعتماد کرتے ہیں۔دھونی کی جانب سے لیے گئے ریویو زیادہ تر صحیح ثابت ہوتے ہیں اور شاید اسی لئے اس معاملے میں انہیں ویراٹ سے بہتر کپتان قرار دیا جارہا ہے۔
