نئی دہلی ۔14اگسٹ(سیاست ڈاٹ کام) انگلینڈ کے خلاف پہلے دو ٹسٹ مقابلوں میں شرمناک شکست کے بعد تیسرے ٹسٹ میں کارکردگی کی بنیاد پرکوچ روی شاستری اورکپتان ویراٹ کوہلی کو بی سی سی آئی کے سوالوں کا سامنا کرنا پڑسکتا ہے۔ چوتھے اور پانچویں ٹسٹ کے لئے ٹیم کا انتخاب تیسرے ٹسٹ کے بعد کیا جائے گا، جو ہفتہ کو ناٹنگھم میں شروع ہوگا۔اس کے نتیجے کے بعد ہی بورڈ آگے ہونے والی کارروائی کے بارے میں فیصلہ کرے گا۔ بورڈ کے ایک سینئرعہدیدار نے کہا ہندوستانی ٹیم یہ شکایت نہیں کرسکتی کہ اسے تیاری کے لئے مناسب وقت نہیں ملا۔جنوبی افریقہ کی سیریزکے بعد کھلاڑیوں نے مصروف پروگرام اور پراکٹس میچوں کی کمی کی شکایت کی تھی۔ ان سے بات کرنے کے بعد ہی ہم نے طے کیا کہ محدود اووروں کی سیریز ٹسٹ میچ سے قبل کھیلی جائیں گی۔انہوں نے کہا کہ سینئر ٹیم کے کہنے پر ہی ہم نے ہندوستان اے ٹیم کو اسی وقت دورے پر بھیج دیا۔ دوسینئر کھلاڑی اجنکیا رہانے اورمرلی وجے اس دورے پرساتھ گئے جوانہوں نے چاہا، ہم نے سب کیا۔ اب نتیجے نہیں آرہے ہیں توبورڈ کو سوال کرنے کا پورا حق ہے۔ہندوستان کے سیریزہارنے پرروی شاستری اورکوہلی کے اختیارات میں کمی ہوسکتی ہے۔ عہدیداروں نے کہا کہ شاستری اور موجودہ معاون عملہ کی زیر سرپرستی ہندوستانی ٹیم کو آسٹریلیا میں (15۔2014 میں 2-0 )، جنوبی افریقہ (18۔2017 میں2-1) کے ساتھ سیریز میں شکست کا سامنا کرنا پڑا اوراب ہم انگلینڈ کے دورہ میں بری حالت میں ہیں۔
