دبئی۔30 جولائی(سیاست ڈاٹ کام)پاکستانی اوپنر فخر زمان کیریئر میں پہلی مرتبہ انٹرنیشنل کرکٹ کونسل (آئی سی سی) ونڈے درجہ بندی میں16ویں مقام پر آ گئے ہیں۔وہ پہلی مرتبہ ونڈے درجہ بندی میں سرفہرست20 بیٹسمینوں کی فہرست میں جگہ بنانے میں کامیاب ہوئے ہیں۔درجہ بندی کے مطابق وہ بابر اعظم کے بعد دوسرے پاکستانی بیٹسمین ہیں جو بیس صفِ اول کے بیٹسمینوں میں شامل ہیں۔زمبابوے کو پانچ میچوں میں شکست کے باوجود پاکستانی ٹیم ونڈے درجہ بندی میں پانچویں مقام پر ہی برقرار ہے۔زمبابوے کے خلاف ون ڈے سیریز میں فخر زمان نے 515 رنز بنائے جس کی بنا پر 22 درجے اوپر آئے ہیں اور اب ان کا نمبر 16واں ہے۔پاکستان اور زمبابوے کے درمیان ابتدائی تین ون ڈے میچوں کے بعد فخر زمان24 ویں نمبر پر تھے ،چوتھے ونڈے میں 210 اورآخری میچ میں 85 رنز بناکر انہوں نے درجہ بندی میں غیر معمولی چھلانگ لگائی ہے۔ بیٹسمینوں میں ہندوستان کے کپتان ویرات کوہلی پہلے اور پاکستان کے بابر اعظم دوسرے نمبر پر ہیں،اس کے بعد جو روٹ تیسرے اور روہت شرما چوتھے نمبر پر ہیں۔بابر اعظم زمبابوے کے خلاف سیریز میں 184 رنز اسکورکرنے پرایک درجے ترقی کے بعد ونڈے درجہ بندی میں دوسرے نمبر پر آگئے ہیں،فخر زمان کے ساتھی اوپنر امام الحق کی بھی ونڈے درجہ بندی میں بہتری ہوئی وہ 43 ویں نمبر پر فائز ہیں، امام الحق نے زمبابوے کے خلاف سیریز میں تین سنچریوں کی مدد سے 395 رنز اسکور کئے تھے۔امام الحق 51درجے بہتری کے بعد 43ویں نمبر پر آگئے ہیں۔بولنگ میں ہندوستان کے جسپریت بمرا پہلے نمبر پر ہیں جبکہ افغانستان کے راشد خان دوسرے اور پاکستان کے حسن علی تیسرے نمبر پر ہیں۔دنیا کے ٹاپ آل راؤنڈرز میں بنگلہ دیش کے شکیب الحسن پہلے افغانستان کے محمد نبی دوسرے اور محمد حفیظ تیسرے نمبر پر ہیں۔آئی سی سی ونڈے ٹیم درجہ بندی میں انگلینڈ پہلے نمبر پر موجود ہے جبکہ ہندوستان دوسرے ، جنوبی افریقہ تیسرے ، نیوزی لینڈ چوتھے ، پاکستان پانچویں، آسٹریلیا چھٹے ، بنگلہ دیش ساتویں، سری لنکا آٹھویں، ویسٹ انڈیز نویں اور افغانستان دسویں نمبر پر فائز ہے۔
