ڈھاکہ ۔24 اکٹوبر (سیاست ڈاٹ کام ) بنگلہ دیشی اوپنر تمیم اقبال نے ہندوستانی ٹیم کے کپتان ویراٹ کوہلی کو 10 ہزار رنز کی تکمیل پر خراج تحسین پیش کرتے ہوئے کہا ہے کہ کوہلی کبھی کبھی تو انسان ہی نہیں لگتے اور ایسا لگتا ہے کہ وہ ہر مرتبہ سنچری بنانے کے لیے ہی میدان میں اترتے ہیں۔ بنگلہ دیشی اوپنر نے کہا کہ کوہلی جس طرح کارکردگی دکھاتے ہیں اس سے کبھی کبھی ایسا لگتا ہے کہ وہ انسان ہی نہیں ہیں، جب وہ بیٹنگ کے لیے میدان میں آتے ہیں تو ایسا لگتا ہے کہ ہر مرتبہ سنچری ہی اسکور کریں گے۔ خلیج ٹائمز سے گفتگو کرتے ہوئے تمیم نے مزید کہاکہ کوہلی جس طرح اپنا خیال رکھتے ہیں اور جس طرح اپنے کھیل پر کام کرتے ہیں وہ ناقابل یقین ہے، وہ اس وقت تینوں فارمیٹ کے بہترین بیٹسمین ہیں اور وہ ایک ایسے کھلاڑی ہیں جن سے بہت کچھ سیکھا جا سکتا ہے۔ ہندوستانی ٹیم کے کپتان کوہلی اس وقت ونڈے اور ٹسٹ کرکٹ میں پہلے نمبر پر موجود ہیں اور انہیں ونڈے کرکٹ میں تیز ترین 10ہزار رنز مکمل کرنے کے لیے دوسرے ونڈے سے قبل 81 رنز درکار تھے۔ کوہلی سے قبل یہ ریکارڈ ہندوستان ہی کے عظیم بیٹسمین سچن ٹنڈولکر کے نام تھا جنہوں نے 259 اننگز میں یہ کارنامہ انجام دیا تھا جبکہ کوہلی نے یہ کارنامہ صرف 205 اننگزمیں انجام دیا ہے۔ تمیم نے کہا کہ میں نے گزشتہ 12سال میں کرکٹ کھیلنے والے تمام عظیم کھلاڑیوں کو دیکھا ہے، ان سب کی اپنی اپنی خوبی تھی لیکن جس طرح کوہلی کھیل پرحاوی رہے ہیں، اس طرح کوئی بھی نہیں رہا۔ہندوستانی کپتان ویراٹ کوہلی نے یہاں ویسٹ انڈیز کے خلاف کھیلے گئے دوسرے ونڈے میں اپنے کیرئیر کے 10 ہزار رنز مکمل کر لیے ہیں اور اس طرح انہوں نے سچن ٹنڈولکر کا ریکارڈ توڑدیااور جس رفتار سے کوہلی رنز بنانے رہے ہیں اس کے بعد سچن کا تقریباً ہر ریکارڈ کوہلی کے نام ہوتا دکھائی دے رہا ہے۔
