شارجہ ۔25 فروری (سیاست ڈاٹ کام )کراچی کنگز کے کولنگ انگرام نے پاکستان سوپر لیگ (پی ایس ایل) میں سب سے بڑی انفرادی اننگز کھیلنے کا ریکارڈ توڑ دیا۔شارجہ کرکٹ اسٹیڈیم میں کوئٹہ گلیڈی ایٹرز کے خلاف کراچی کنگز کی جانب سے کھیلتے ہوئے انہوں نے یہ ریکارڈ اپنے نام کیا۔جنوبی افریقہ سے تعلق رکھنے والے بائیں ہاتھ کے بیٹسمین کولن انگرام نے اپنی اننگز کے دوران 8 چھکوں اور 12 چوکوں کی مدد سے شاندار 127 رنز بنائے جو اب تک پی ایس ایل کی تاریخ کی سب سے بڑی انفرادی اننگز ہے۔ اس سے قبل یہ ریکارڈ شرجیل خان کے پاس تھا جنہوں نے پی ایس ایل کے افتتاحی ٹورنمنٹ میں اسلام آباد یونائیٹڈ کی جانب سے کھیلتے ہوئے پشاور زلمی کے خلاف اپنی اننگز میں 8 چھکوں اور 12 چوکوں کی مدد سے 117 رنز اسکور کرکے یہ ریکارڈ اپنے نام کیا تھا۔ اس کے علاوہ کولن انگرام پی ایس ایل میں سنچری اسکور کرنے والے پہلے غیر ملکی کھلاڑی بھی بن گئے ہیں۔ پی ایس ایل میں اس سے قبل تین مرتبہ سنچریاں اسکور ہوچکی ہیں جن میں ایک مرتبہ شرجیل خان جبکہ 2 مرتبہ کامران اکمل نے یہ کارنامہ انجام دیا تھا۔ کولن انگرام کی 127 رنز کی اننگز ان کے ٹی ٹوئنٹی کیریئر کی سب سے بڑی اننگز بھی بن گئی۔ اس کے علاوہ کولن انگرام نے اپنی اننگز کے دوران پی ایس ایل میں ایک اننگز میں سب سے زیادہ 8 چھکے لگانے کا ریکارڈ بھی برابر کردیا۔ کولن انگرام کے علاوہ عمر اکمل، شرجیل خان، کیون پیٹرسن اورکامران اکمل بھی ایک اننگز کے دوران 8 چھکے لگا چکے ہیں۔
