کراچی ۔14 مارچ (سیاست ڈاٹ کام )پاکستان سوپر لیگ (پی ایس ایل) کے پلے آف مرحلے کے کوالیفائر میچ میں کوئٹہ گلیڈی ایٹرز نے اعصاب شکن مقابلے کے بعد پشاور زلمی کو10 رنز سے شکست دے کر تیسری مرتبہ پی ایس ایل کا فائنل کھیلنے کا اعزاز حاصل کرلیا۔ کپتان ڈیرن سیمی نے ٹاس جیت کر کوئٹہ گلیڈی ایٹرز کو پہلے بیٹنگ کرنے کی دعوت دی تھی۔ احمد شہزاد نے شین واٹسن کے ہمراہ اننگز کا آغاز کیا اور اس مرتبہ صرف ایک رن بنانے کے بعد 3 کے مجموعے پر ٹائمل ملز کی تیز رفتار گیندر پر کلین بولڈ ہوگئے۔ ان کے بعد شین واٹسن نے کراچی کے نیشنل اسٹیڈیم میں بھی اپنے جارحانہ کھیل کی جھلک پیش کی اوراحسن علی کے ہمراہ ابتدائی 5 اوور میں ہی نہ صرف ٹیم کی نصف سنچری مکمل کی بلکہ 50 رنز کی شراکت بھی مکمل کی۔ شین واٹسن نے کوئٹہ گلیڈی ایٹرز کی ماضی کی تمام مایوسیوں کو پیچھے چھوڑتے ہوئے پشاور زلمی کے خلاف اپنا جارحانہ کھیل جاری رکھا۔واٹسن نے پی ایس ایل کے دوران اپنی 7ویں نصف سنچری مکمل کی اور ٹیم کو بڑے ہدف کی جانب گامزن کیا۔ واٹسن 71 رنز بنانے کے بعد 114 کے مجموعے پر وہاب ریاض کی گیند پر بولڈ ہوگئے عمر اکمل کے 22، سرفراز احمد اور ڈیوین براوو کے 11، 11 رنز کی بدولت کوئٹہ گلیڈی ایٹرز کی ٹیم مقررہ 20 اوورز میں 6 وکٹوں کے نقصان پر 186 رنز بنا کرآؤٹ ہوگئی۔ فائنل میں پہنچنے کے لیے پشاور زلمی کے سامنے 187 رنز کا ہدف موجود تھا۔ اوپنرز نے ٹیم کے لیے اچھاآغاز فراہم کیا تاہم سست روی سے جاری اس پارٹنرشپ کو 41 رنز پر بریک لگ گئی جب کامران اکمل 26 گیندوں پر 22 رنز بنانے کے بعد آؤٹ ہوئے۔ تجربہ کار مصباح الحق نے 17 گیندوں پر صرف 18 رنز کا اضافہ کیا۔مصباح الحق 90 کے مجموعے پر پویلین لوٹے تو پشاور زلمی کو جیت کے لیے 16.16 کی اوسط سے 36 گیندوں پر 97 رنز درکار تھے۔ ڈیرن سیمی نے کیرون پولارڈ کے ساتھ مل کر اس تقریباً ناممکن ہدف کو ممکن کرنے کا ذمہ اٹھایا۔ دونوں کھلاڑیوں کی جانب سے لگائے گئے ہمالیائی چھکوں اور تیزی سے باؤنڈری کی جانب جاتے ہوئے چوکوں کی مدد سے پشاور زلمی کی جیت کی امیدیں روشن ہوئیں۔ دونوں نے محض 38 گیندوں میں 83 رنز کی پارٹنر شپ قائم کرکے کوئٹہ گلیڈی ایٹرز کی امیدوں کو توڑنے کی کوشش کی تاہم زلمی کو جیت کے لئے آخری اوور میں 21 رنز درکار تھے۔ شین واٹسن کو آخری اوور دیا گیا جو تقریباً ایک سال بعد ٹی ٹوئنٹی کرکٹ میں بولنگ کررہے تھے۔ اوور کی دوسری گیند پر کیرون پولارڈ نے چھکا لگا کر ٹیم کے خسارے کو کم کرنے کی کوشش کی تاہم تیسری گیند پر پولارڈ بولڈ ہوگئے اس کے بعد وہاب ریاض کیریز پر آئے جنہوں نے ڈیرن سیمی کو اسٹرائیک دینے کی کوشش کی تاہم چوتھی گیند پر ڈیرن سیمی بھی رن آؤٹ ہوگئے۔ پشاور زلمی کی ٹیم اس میچ میں مقررہ 20 اوورز میں 7 وکٹوں کے نقصان پر 176 رنز ہی بناسکی اور 10 رنز سے شکست کا سامنا کرنا پڑا۔
