ریسیف (برازیل) 21جون( ساست ڈاٹ کام ) کریم بینزیمانے رواں ورلڈ کپ میں اپنا تیسرا گول کرلیا ہے اور برازیل میں جاری ورلڈ کپ میں گذشتہ روز کھیلے گئے گروپ ای کے مقابلوں میں فرانس نے سوئٹزرلینڈ کو اور ایکواڈور نے ہونڈاروس کو شکست دے دی ہے۔پہلے میچ میں فرانس نے سوئٹزرلینڈ کو 5-2 گول سے شکست دے دی ہے۔اس فتح کے نتیجے میں جہاں فرانس گروپ ای میں سرفہرست آ گیا ہے وہیں اس کے اگلے مرحلے میں رسائی کے امکانات بھی روشن ہوگئے ہیں۔اس میچ میں سوئس ٹیم فرانس کے سامنے ایک کلب درجے کی ٹیم نظر آئی۔میچ کے دوران سوئس گول پر لگاتار حملوں کے بعد ایسا لگ رہا تھا کہ یہ میچ صرف سوئس گول کیپر اور فرانسیسی اسٹرائیکرس کے درمیان کھیلا جا رہا ہے۔سیلواڈور میں کھیلے جانے والے میچ کی شروعات نسبتاً آہستہ رہیں تاہم ابتدائی 15 منٹ کے بعد فرانس کے کھیل
اور حملوں میں تیزی آ گئی۔اس تیزی کا نتیجہ میچ کے 17 ویں منٹ میں 20 سیکنڈس کے فرق سے فرانس کے دو گولس کی شکل میں برآمد ہوا۔اپنی ٹیم کو بری طرح ہارتے دیکھ کر سوئس تماشائی مایوس نظر آئے ۔پہلا گول اس ورلڈ کپ میں اپنا پہلا میچ کھیلنے والے اولیویئر جیروڈ نے کارنر کک پر ہیڈر کے ذریعہ کیا۔ یہ فرانس کا ورلڈ کپ میں 100 واں گول بھی تھا۔اس کے چند لمحے بعد ہی بلائیس میتوئیدی کے گول کی بدولت فرانس کی برتری دوگنی ہوگئی۔فرانس کی اس برتری کو ختم کرنے کے لئے سوئس فارورڈ زاہکا نے گول تو کیا لیکن ریفری نے پہلے ہی آف سائیڈ کا جھنڈا بلند کر دیا تھا اور اسطرح یہ کوشش رائیگاں گئی۔اسی دوران فرانسیسی اسٹرائیکر کریم مصطفیٰ بینزیما کو سوئٹزرلینڈ کے دفاعی کھلاڑی ڈجورو نے ڈی میں گرا دیا جس پر فرانس کو پنالٹی مل گئی۔پنالٹی لگانے کا موقع بینزیما کو ہی دیا گیا لیکن ان کی کک سوئس کیپر بینگالیو نے روک لی اور فرانس کی برتری میں اضافے کا موقع کچھ دیر کے لئے ٹل گیا۔جلد ہی فرانس کے لئے پہلا گول کرنے والے جریئود نے سوئس ڈی میں والبوئیناکو ایک عمدہ پاس دیا جنھوں نے برتری تین گول کرنے میں کوئی غلطی نہ کی۔کریم پنالٹی پر تو گول نہ کر سکے لیکن 67ویں منٹ میں انھوں نے سوئس دفاعی کھلاڑی کی غلطی کا فائدہ اٹھاتے ہوئے ٹیم کا چوتھا گول کر دیا۔ یہ ورلڈ کپ میں کریم بینزیما کا تیسرا انفرادی گول تھا۔ میچ کے 73 ویں منٹ میں موسیٰ سیسوکو کے گول کی بدولت جب فرانس نے 5-0 کی برتری حاصل کی تو لگتا تھا کہ سوئس ٹیم ہمت ہار بیٹھی ہے۔تاہم پانچ گول کے خسارے میں جانے کے بعد آخری چند منٹ میں سوئس ٹیم نے دو گول کر کے اسکور کچھ بہتر بنا دیا۔کھیل کے آخری لمحے میں کریم بینزیما نے فرانس کی جانب سے چھٹی بار گیند سوئس گول میں پہنچائی لیکن یہ گول اس لئے قبول نہیں کیا گیا کہ ریفری گیند گول میں پہنچنے سے پہلے میچ ختم ہونے کی سیٹی بجا چکے تھے۔
علاوہ ازیں گروپ ای کا دوسرا میچ وسطی امریکہ کے دو ممالک ہونڈاروس اور ایکواڈر کے مابین کھیلا گیا جو گولس سے زیادہ دونوں ٹیموں کے جارحانہ ٹیکلز اور فاؤلز کے لئے یاد رکھا جائے گا۔یہ میچ ایکواڈور نے 2-1 گول سے جیتا۔بیلینسیا نے اپنا پہلا بین الاقوامی گول ہونڈاروس کے خلاف کیا۔میچ میں ہونڈوارس کی ٹیم نے کاسٹلی کے گول کی بدولت برتری حاصل کی۔ یہ ہونڈوراس کا 32 سال میں پہلا ورلڈکپ گول تھا۔اس گول کو جلد ہی مانچسٹر یونائیٹڈ کی طرف سے کلب فٹبال کھیلنے والے ایکواڈور کے مڈفیلڈر بیلینسیا نے برابر کر دیا۔یہ بیلینسیا کا پہلا بین الاقوامی گول تھا اور دوسرے گول کے لئے بھی انھیں زیادہ انتظار نہیں کرنا پڑا اور اگلے ہاف میں کھیل کے 65ویں منٹ میں انھوں نے ایکواڈور کے لئے دوسرا اور فیصلہ کن گول کر دیا۔اس میچ میں ہونڈوراس کے دو گول مسترد کئے گئے جن میں ایک میں کھلاڑی آف سائیڈ تھا جبکہ دوسرے میں گیند اس کے ہاتھ پر لگی تھی۔اس فتح کے نتیجے میں ایکواڈور کی ٹیم گروپ میں دوسرے نمبر پر آ گئی ہے۔ اس وقت گروپ ای میں فرانس پہلے، سوئٹزرلینڈ تیسرے اور ہونڈاروس چوتھے نمبر پر ہے۔