نئی دہلی ،22مئی ( سیاست ڈاٹ کام ) لوک سبھا انتخابات میں ناکامی پر ’’ٹیم راہول ‘‘ پر درپردہ تنقید کرتے ہوئے پارٹی قائدین نے آج کہاکہ کانگریس کو جارحانہ انداز میں خود احتسابی کرنی چاہئے ۔ صرف وہی لوگ قیادت کے مرتبہ تک پہنچنے چاہئیں جنہیں فیلڈ ورک کا تجربہ ہو۔ کانگریس قائد ملنددیورا نے کہا کہ راہول گاندھی کے مشیروں کو بنیادی سطح سے اٹھنے والی آوازوں پر توجہ دینی چاہئے، جنھیں کوئی انتخابی تجربہ نہیں، وہی ہدایات جاری کررہے ہیں۔ انہوں نے کہا کہ اُن کا تبصرہ پارٹی سے گہری وفاداری اور انتخابات میں اس کی کارکردگی پر تکلیف کے احساس کا نتیجہ ہے ۔ انہوں نے اپنے ٹوئیٹر صفحہ پر تحریر کیا کہ پارٹی کا فیلڈ ورک اور انتخابی مقابلہ بنیادی حقائق کے جامع معلومات کی کلید ہیں۔ ان کا تبصرہ نمایاں اہمیت رکھتا ہے کیونکہ پارٹی میں سرگوشیاں جاری ہے کہ ایسے افراد جن کو انتخابات کا کوئی تجربہ نہیں ہے اور جو سیاست میں نوارد ہیں ، انھیں قیادت اور فیصلہ سازی کے اہم عہدے دے دیئے گئے ہیں ۔ وہ انتخابی مہم چلانے اور اتحاد کرنے جیسے اہم معاملات کے فیصلے کررہے ہیں ۔ کُل ہند کانگریس کی سکریٹری پریہ دت نے صدر کانگریس سونیا گاندھی سے آج ملاقات کر کے پارٹی قائدین سے عوام کی بے اطمینانی اور ترک تعلق کے بارے میں انہیں اطلاع دی ۔
ملند دیورا شیوسینا امیدوار کے مقابلہ میں جنوبی ممبئی سے اور پریہ دت بی جے پی کی پونم مہاجن کے مقابل ناکام ہوئے ہیں ۔ پارٹی کے سینئر قائد ستیہ ورت چترویدی نے پریہ دت اور ملند دیورا کے خیالات سے اتفاق کرتے ہوئے امید ظاہر کی کہ مسائل کی یکسوئی کیلئے جدت پسند خود احتسابی کی جائے گی ۔چترویدی نے کہا کہ ملند دیوراجو کچھ کہہ چکے ہیں ممکن ہے کہ مکمل طور پر درست نہ ہو لیکن اس کا کچھ حصہ یقیناً درست ہے ۔ پارٹی کو سخت خود احتسابی کی ضرورت ہے ۔ چترودیدی نے کہا کہ دیورا کا تبصرہ کہ پارٹی کو خود احتسابی کی درکار ہے غلط نہیں ہے ۔ پریہ دت نے اپنا یہ موقف برقرار رکھا ہے کہ بہت زیادہ تنقیدیں ہورہی ہیں اور کانگریس کو جائزہ لینا ہوگا کہ گزشتہ 10سال میں کیا غلطی ہوئی ہے۔ اگرچہ یوپی اے نے 10سال میں اچھی کارکردگی کا مظاہرہ کیا ہے لیکن ہم اس کے کارنامے عوام تک نہیں پہنچا سکے۔