نئی دہلی ۔ /7 اپریل (سیاست ڈاٹ کام) کانگریس پارٹی میں قیادت کے مسئلہ پر جاری اختلافات کے پس منظر میں پارٹی نے آج کہا کہ سونیا گاندھی اور راہول گاندھی دونوں قائدین کی پارٹی کو ضرور ت ہے جو ہماری رہنمائی کرتے رہیں گے ۔ کانگریس کمیونیکیشن ڈپارٹمنٹ کے انچارج رندیپ سرجے والا نے آج ذرائع ابلاغ کے نمائندوں سے بات چیت کرتے ہوئے کہا کہ پارٹی میں ایسی کوئی لڑائی نہیں ہے ۔ سونیا گاندھی اور راہول گاندھی دونوں پارٹی کے قائدین ہیں جن کی قیادت رہنمائی اور توجہ پارٹی کو مستحکم بنانے کیلئے ضروری ہے ۔ انہوں نے مختلف سوالات کا جواب دیتے ہوئے کہا کہ سونیا گاندھی اس وقت پارٹی صدر ہیں اور جب کبھی تبدیلی ہوگی آپ کو مطلع کیا جائے گا ۔ کانگریس ترجمان سندیپ ڈکشٹ کی جانب سے سونیا گاندھی کی تائید پر انہوں نے کہا کہ پارٹی میں ہر شخص سونیا گاندھی کو اپنا قائد تسلیم کرتا ہے ۔
