کراچی، 14 اپریل (سیاست ڈاٹ کام)کرکٹ ورلڈ کپ 2015 کے دوران پاکستانی کھلاڑیوں کی جانب سے کی گئی ڈسپلن کی خلاف ورزی کے نتیجے میں عائد کردہ جرمانہ پاکستان کرکٹ بورڈ (پی سی بی) نے معاف کر دیا ہے۔ دو ماہ قبل کرکٹ کے عالمی ٹورنمنٹ کے وارم اپ میچز میں سات پاکستانی کھلاڑیوں نے سڈنی میں تاخیر سے ہوٹل پہنچ کر ’کرفیو ‘کے اوقات کی خلاف ورزی کی تھی جس کے نتیجے میں منیجر اکرم چیمہ نے شاہد آفریدی، احمد شہزاد اور وہاب ریاض سمیت سات کھلاڑیوں پر تین ،تین سو ڈالرز کا جرمانہ عائد کیا تھا۔ تاہم آکلینڈ میں جنوبی افریقہ کو شکست دینے کی خوشی میں منیجر نے عائد کردہ جرمانہ معاف کر دیا ہے ۔ تاہم انہیں خبردار کیا کہ آئندہ ڈسپلن توڑنے والے کو معاف نہیں کیا جائیگا۔ میڈیا رپورٹس کے مطابق منیجر اکرم چیمہ نے واضح کیا کہ کھلاڑیوں کی جانب سے ڈسپلن کی خلاف ورزی کا کوئی بڑا واقعہ پیش نہیں آیا، کھلاڑیوں کے تاخیر سے ہوٹل پہنچنے کی وجہ سے ان پر جرمانہ لگایا گیا تھا جو جنوبی افریقہ کیخلاف فتح کے بعد معاف کر دیا گیا تھا۔ انہوں نے کھلاڑیوں کو خبردار کیا کہ ڈسپلن کی خلاف ورزی کرنے والوں کے ساتھ نرمی نہیں برتی جائے گی۔ میچ کے دوران کھلاڑیوں کا رویہ بھی ڈسپلن کا حصہ ہوتا ہے۔
